EDITORIAL: Baro nga Administrasion, Baro a Namnama

NAPALAUS ti namnama dagiti adu a Pilipino iti panangrugi ti baro nga administrasion a masolbaren dagiti adu a nadagsen a parikut a mangparparigat kadagiti umili.

 

Mangnamnama dagiti nagadu a bimmotos ken ni Mayor Rodrigo Duterte a nangabaken a Presidente ti Pilipinas nga aramidennanto ken tungpalennanto dagiti nagadu a karina kabayatan ti kampania.

 

Naglaplapusanan dagiti nagun-od ni Duterte a botos iti laksid dagiti adu nga isyu a naibato kontra kenkuana kas ti pammapatay ken panagabusarna ti kalintegan dagiti tattao a maatap a kriminal; ti kinababaerona; ti kinarasaw ti panagsasaona kas ti panagsaritana iti dakes ken ni Papa Francisco; ti angaw ken dakes a komentariona iti napapatay ken narames a misionera nga Australiana a na-hostage iti pagbaludan sadiay Davao City idi 1987; ken dagiti naibutaktak nga adu a bank accounts a naipanagan kadagiti annakna.

 

Ti kaadu ti nagun-od a botos ni Duterte ket iyanninawna nga adun nga umili dagiti nadismaya ken desperado iti agdama a kasasaad ti pagilian, ket mangnamnamada nga isuna ti makasolbar kadagiti adu a nadagsen a problema a mangparparigat kadagiti umili.

 

Nanglayus ti botos ni Duterte uray no awan ti napigsa a makinaria wenno partidona. Isuna ti kaudian a nangideklarar ken nangipila ti kandidaturana ta simmukat a kandidato laeng ti Partido Demokratiko ng Pilipinas – Lakas Ng Bayan (PDP – Laban). Ngem nagadu ti nangarusan ni Duterte kadagiti nakasalisalna nga immun-una nga amang a nangideklarar ti panagkandidatoda. Immipus kenkuana iti pito a million a botos ni Sec. Mar Roxas, ken ad-adu pay da Sen. Grace Poe, Vice Pres. Jejomar Binay ken Sen. Miriam Defensor-Santiago.

 

Inaklonen da Roxas ken Poe a kangrunaan a nakabalubal ni Duterte ti pannakaabakda ket inkarida ti pannakikaysada iti sumaruno nga administrasion. Inawisda pay dagiti bimmotos kadakuada ti pannakitimpuyogda iti baro nga administrasion tapno magun-od ti kappia ken panagdur-as ti pagilian.  Indiayan ni Sen. Antonio Trillanes IV ti pannakikappiana ken ni Duterte gapu ti imbutaktakna a kontrobersial nga isyu dagiti bank accounts kabayatan dagiti maudi nga aldaw ti kampania.

 

Uray ti Catholic Bishops’ Conference of the Philippines a nagduadua iti integridad ken moralidad ni Duterte no mayanatup iti kina-presidente ket indiayadan ti ima ti kappia para ti pagimbagan ti sapasap a pagilian. Uray dagiti gobierno dagiti ganggannaet a pagilian ken grupo dagiti dadakkel a negosiante a sigud a nagduadua iti integridad ken sirmata ni Duterte ket binigbig ken impatalgeddan ti pannakikaysada iti baro nga administrasion. Nangbukelen ni Pres. Benigno Aquino III iti Transition Committee a mangisagana ti naannayas a panangiyallawatna ti turay ken ni Duterte.

 

Sumagmamano kadagiti kari ni Duterte a nangallukoy kadagiti botante ket ti panangpasardengna iti las-ud ti tallo agingga iti innem a bulan kadagiti adu a krimen nangruna ti panagraira ti illegal a droga iti pagilian; ti pannakapasayaat dagiti sistema ti transportasion ken komunikasion; ti pannakagun-od ti kappia iti nagbaetan ti gobierno ken dagiti rebelde a komunista ken Muslim; ti pannakaisardengen ti sistema ti “contractualization” iti sektor dagiti mangmangged; ti pannakapadur-as ti sektor ti negosio ken agrikultura; ti pannakayimplementar ti “Freedom of Information;” ti pannakasolbar ti problema iti West Philippine Sea; pannakaadaptar ti “Federalism” a sistema ti gobierno; ken dadduma pay a mangpasayaat ti kappia ken ekonomia.

 

Nagtimeken dagiti adu a botante a ni Duterte ti kayatda a mangidaulo ti pagilian. Mangnamnama dagiti umili nga iti panagbalinna a Presidente ket tungpalenna dagiti amin a karina, ken mapaglunitna dagiti nauneg a sugat a pinataud ti narugit a sistema ti politika iti pagilian. (Eden A. Alviar)