EDITORIAL: Brain Gain ken Addang a Naidugmam

Makapamurareg ti rason no apay a nailukat ti employment services para kadagiti ganggannaet iti benneg ti architecture, aviation, chemical engineering, chemists, environmental planners, guidance counsellors, librarians,  assembly technicians ken sumagmamano pay kadagiti sangapulo ket lima a trabaho a nailukat. Maysa kano a brain gain ti nasao nga addang, ti pannakanayon ken pannakapalawa ti ammo ken kabaelan kadagitoy a propesion. Pudno dayta, ngem tumpuar ti ngatangata.

Nupay tinawen dagiti agraduar kadagiti nasao a kurso, mapasamak met ti brain drain wenno panagpanaw dagiti makabael kadagita a benneg. Mapasamak daytoy maigapu iti kinababa iti ganaren dagitoy a propesional iti pagilian. Natural a sapulenda ti naberberde ken narabraber a pagaraban iti sabali a pagilian a makaited iti nabilbileg a gutad ti pagnam-ayan.

Makuna a saan a naannayas ti pannakatingiting ti balanse  a labor force. No kayat a saan a madegdegan ti pasamak, nasken a taldiapan met ti sasaaden ti panagpatrabaho iti pagilian. Saanen a mailibak pay  nga inaladanen dagiti sabali a pagilian ti talento, sirib ken kabaelan dagiti makabael a mangmangged ket isudan iti ad-adda nga agnumar. Ngamin,  makaengganio dagiti ipaayda a nangato a ganaren ken dadduma pay a benepisio ken insentibo kadagiti kasapulanda a mangmangged, malaksid laeng a  karaman a maipaayan dagiti kameng ti pamiliada a makipagnaed kadakuada.

Ti panagkurkurang kadagiti nainaganan a trabaho ket saan laeng nga ita a mapasamak, nadlawanen daytoy maysan a dekada iti napalabas. Inayonan ti Trade Union Congress of the Philippines daytoy a paliiw nupay adda panagduadua no kagaten dagiti ganggannaet nga agganar laeng iti maminting no idilig iti rineppet a papel de bangko iti pagilianda wenno iti sabali a pagilian.

No maited la koma ti gobierno ti maitutop a ganaren, benepisio ken insentibo kadagiti mangmangged, no saan a liwayan ti pannaka-update dagiti curriculum iti edukasion tapno masakayan ti sumsumiag a panagdur-as, adayo a mapasamak ti brain drain. Awan ti kaimudingan a maikapattayo a pagilian a kaaresgaan a pagtaudan ti mangmangged iti lubong no datayo met ti maawanan.

Maibilang kadi a panagabante ti addang a naidugmam?

Ti panagpannuray iti sabali iti maitutop nga aramiden ket maibilang a panangiregreg iti kinaasino. Saan aya, a nasaysayaat a patarayen a bukod ti pagilian ngem dagiti ganggannaet?#