EDITORIAL: Bukod nga interes dagiti agtuturay

Saan latta a mapukaw ti tignay a mangbalbaliw iti konstitusion uray iti baet ti isusupiat dagiti umili. Ita, idurduron dagiti agilinlinteg a kaaliado ni Presidente Gloria Arroyo ti pannakaamendar ti konstitusion babaen ti constituent assembly uray awan ti pannakipaset ti Senado.

Agpayso, adda dagiti paset ti konstitusion a rebbengnan a mabaliwan agsipud ta saandan a maitutop iti agdama a panawen.Ngem pagduaduaanmi ti sinseridad dagiti agilinlinteg iti Kamara iti daytoy ipagpagnada a pannakaamendar ti Konstitusion a saanda nga ibibiang ti Senado. Saankami a mamati iti palusotda a mabalin ti Kamara ti mangiwayat iti pannakabalbaliw iti Konstitusion uray saan a makipaset dagiti senador. Maysa daytoy a napeggad nga addang a mabalin a mangiduron iti pagilian iti krisis a konstitusional.

Kasapulan ti two thirds vote, agpada iti Kamara ken iti Senado tapno maiwayat aniaman a pannakaamendar ti Konstitusion. Iti bukodmi a kapanunotan, awan ti nalagda a pagbatayan dagiti diputado a mangibaga a kasapulan laeng ti two-thirds vote ti nagtipon a Kamara ken Senado tapno maipakat ti pannakabaliw ti Konstitusion.

Ammo ngamin ti Kamara a saanda a magemgeman ti Senado. Ammoda a ti Senado ti lapped iti panggepda a mangsalikawkaw iti linteg tapno laeng mapagustuanda ti amoda iti Malakaniang. Ammoda a no masurot ti two-thirds vote ti agtipon a Kamara ken Senado, uray agbutos amin dagiti senador maikontra iti pannakaamendar iti Konstitusion, mangabakda latta ta kukuada ti numero. Ket no mapagballigianda ti pannakaiwayat ti pannakaamendar ti Konstitusion babaen ti constituent assembly, uray agdeppan dagiti senador, saandanton a malapdan ti pannakaipastrek dagiti probiso a mangikkat iti term limits dagiti mabutosan nga opisial kasta met ti pannakabaliw ti porma ti gobierno manipud iti presidensial iti parliamentaria.

Kastoy ti panagut-utek dagiti agilinlinteg iti Kamara. Agdadata a tapno laeng agtalinaed iti turay ti apoda iti Malakaniang a pakairamramananda , iwayatda uray dagiti killo a panagrasrason tapno laeng agballigi daytoy a panggep.

Ngem no ituloyda daytoy a panggepda, dagiti umili ti pagsungbatanda. Ta saan a kayat dagiti umili a makutingting ti konstitusion tapno laeng maitag-ay ti pagimbagan ti maymaysa wenno sumagmamano laeng a tattao.

No pudno a sinsero dagiti agilinlinteg iti Kamara, apay a saanda nga iyuray ti pannakalpas ti eleksion inton 2010 santo maiwayat dagiti panagbalbaliw iti Konstitusion?

Iti daytoy a wagas, makunatayo nga awan ti naun-uneg a panggep dagiti sumagmamano a mangkutingting ti Konstitusion para laeng iti bukodda a pagimbagan.#