Footer

EDITORIAL: Burnham Park, rumbeng laeng nga agbalin nga OTOP

Maysa a damag ti nangtukay iti imatangmi: ti panangipakaammo ni Mayor Reinaldo Bautista nga agbalinen ti Burnham Park a “One Town, One Product (OTOP)” ti siudad.

Iti bukodmi a biang, rumbeng laeng nga agbalin nga OTOP ti Burnham Park agsipud ta malaksid iti kinabaknang ti historiana, daytoy a parke ti maibilang a pagtangsit ti Baguio City a narigat a mabirokan kadagiti sabsabali a siudad.

Masarakan iti Burnham Park dagiti sangapulo ket dua a lugar a napintas a pagpallailangan wenno pagpasiaran dagiti sangsangaili, turista ken uray dagiti agindeg ditoy ken kaparangetna a probinsia kas iti:

*lagoon – daytoy man-made a lagoon ti paborito a pagturongan dagiti turista ta adda dagiti maabangan a magaudan a bangka

*playground, skating rink – nalawa daytoy a pagay-ayaman dagiti ubbing, kasta met a pagiskeitan

*Igorot garden, rose garden, orchidarium – magustuan a pagpasiaran dagiti naayat iti masetas nga agsabsabong ken orchids

Melvin Jones, athletic bowl – naipasdek ditoy ti maysa a grandstand a maaramat no adda sport activities ken addaan iti oval a pagensayoan dagiti atleta ken dagiti agerhisio

*Picnic grove – ditoy ti pagintekan dagiti pamilia ken dagiti sangsangaili a kayatda ti mangaldaw wenno agmalmalem iti parke;

*Japanese Peace Garden –

*Pine Trees of the World –

Paset pay ti Burnham Park ti Sunshine Park a maibilang a “mother of all parks iti siudad” agsipud ta malaksid nga addaan iti nakaluban nga stage nga addaan iti etniko a disenio, addaan pay daytoy iti hardin a nakaimulaan dagiti nadumaduma nga agsabong a masetas.

Nalatak ti Burnham Park a papanan dagiti kayatna ti mapalag-anan ti kaririknada kalpasan ti agmalmalem a panagtrabahoda, pagdalupisakan wenno pagtugawan dagiti naayat iti nakaparsuaan tapno buyaenda ti panagpakada ti init iti laud ken ti in-inut a panangarakup ti parke ti sipnget kas pasimudaag ti isasangbay ti rabii.

Ngem idagadagmi nga ad-adda pay nga ikagumaan dagiti agtuturay ti siudad iti panagbalin daytoy a parke a nadalus ken maysa a lugar a pagpasiaran dagiti tattao nga awan ti dumuko nga amak wenno buteng kadakuada.

Ngamin, kas paliiw ti maysa a konsehal ditoy siudad, agbalbalin metten daytoy a lugar, nangruna iti rabii, a yuyeng dagiti mannipdut, dagiti bugaw ken dagiti babbai nga agitanggaya iti “apagdarikmat a langit”, malaksid laeng ti bulgar a panagtaray ti “negosio” ti sugal a kas iti hueteng.

Iti panagbalinna nga OTOP, rumbeng laeng a mapukaw dagitoy makadadael a tattao ken aktibidad iti parke tapno saan a maabogan dagiti um-umay ditoy agpalpallaing. Dadaelen laeng dagitoy ti napintas nga imahe ti siudad, imahe a salsalaknibanna kadagiti sumang-at a turista.

Kas OTOP, rumbeng nga agbalin ti Burnham Park a nadalus ken natalna a pagpallailangan iti saklot ti narang-ay ken family-oriented a siudad.#