Footer

EDITORIAL: Character formation, rumbeng la unay

Rumbeng la unay ti panggep ti Land Transportation Office a tinawen a panagseminar dagiti amin a drayber ti ambulansia iti pagilian.  Nasken a mapasiken pay ti character formation kadagiti amin a drayber ti ambulansia tapno maliklikan ti desgrasia a pakaimbolbaran dagitoy.

Nasken pay ti re-orientation a tinawen kadagiti drayber tapno maliklikan ti panagabusadoda. Ken kangrunaanna, maadalan manen dagitoy iti umno a pannakaaramat dagiti ambulansia a para iti transportasion kadagiti pasiente ken mataming dagiti solusion tapno maliklikan ti saan nga umno a pannakaaramat dagitoy.

Maipalagip nga iti napalpalabas a damag ket adda dagiti naireport a saan nga umno a pannakaaramat dagitoy a lugan dagiti ospital a puon ti nagririan dagiti dadduma a transport groups. Ngamin, no nagunin ti wangwang dagitoy nga ambulansia, kas reglamento, agpaigid wenno sumardeng amin a lugan tapno mawayaan ti dalan dagitoy.  Dayta ti pribilihio a mait-ited kadagiti amin nga ambulansia nga emerhensia nga agibiahe kadagiti agngangabit ken patay a pasiente.

Ngem kapaliiwan a saan a masursurot dagiti reglamento. Kas iti naipadamag itay nabiit, nagreklamo dagiti sumagmamano a drayber idi matakuatanda a saan met nga iti ospital ti papanan ti agdardaras nga ambulansia no di ket iti maysa nga eskuelaan – napan gayam nagitulod kadagiti ubbing a mapan agiskuela!

Adda pay dagiti makita nga ambulansia a naiparking iti  sanguanan ti shopping mall. Adda pay idi naipadamag nga ambulansia a naiparking iti sanguanan ti maysa a pagsusugalan  Sigurado a saan a pasiente ti intulod ti drayber  dita.

Kadagiti dadduma, mapapati a maaramat ti ambulansia a kas transportasion kadagiti illegal a kontrabando. Ta kadawyan ngamin a saan a masita ti ambulansia kadagiti checkpoint. Saan metten nga usisaen dagiti polis, traffic enforcers ken dagiti tanod a mangkitkita iti trapiko no ania ti karga ti lugan.

Itay sakbay nga agtapos ti tawen, nainbolbar ti ambulansia iti aksidente iti Taguig City ken San Leonardo, Nueva Ecija.  Iti Taguig City, dua ti natay ken innem dagiti nasugatan iti aksidente. Napartak la unay ti ambulansia a rason ti pannakaidungparna iti tool both iti Skyway Toll Plaza. Iti met aksidente iti Nueva Ecija, tallo dagiti natay ken dua dagiti nasugatan.

Panawenen a maipasagepsep kadagiti drayber no kasano nga agmaneho iti depensiba a wagas tapno maliklikan ti desgrasia. Uray pay no agdisnudo dagiti amin a lugan iti masanguanan a mawayaan ti dalan a pagnaan daytoy, saan a maiparbeng a napakaskas unay ti panagpataray ti drayber.

Saan laeng koma a maipasagepsep iti panunot ti drayber ti responsibilidadna iti pasiente ken kadagiti commuters, no di pay ti dina panangabuso iti pribilihio a maited iti ambulansia tapno makaispal iti biag ken maiyadayo iti peggad kadagiti tattao iti kalsada.#