EDITORIAL: Dagiti bangen iti dalan ni presidential candidate Grace Poe

Kadakkelan a damag ita ti panangdiskualipika ti Commissions of Elections ken ni Senadora Grace Poe iti panagpaidasigna para iti kinapresidente iti eleksion inton Mayo 2016 gapu ta saanna a nagun-od “kano” ti residency requirement para iti kandidato para presidente ken saan a natural-born citizen ditoy pagiliantayo.

Sinarurongan ti Comelec Second Division ti petision ni dati a GSIS chief legal counsel Estrella Elamparo a madiskualipika ni Poe a kandidato para presidente agsipud ta agkurang ti residensiana ken saan a natural-born citizen.

Iti petision ni Elamparo a nangkiddawanna ti pannakadiskualipika ni Poe iti panagkandidatona para presidente, kinunana nga adda “material misrepresentation” nga inaramid ni Senador Poe mainaig iti pannakipagili ken residensiana.

Nagramut daytoy iti inlanad ni Poe iti sertipiko ti kandidaturana (COC) idi nagkandidato a para senador idi 2013 a residente iti “6 a tawen ken 6 a bulan” idi Nobiembre 2006.

Kinuna ti Comelec Second Division a no makontar ti period residency ni Poe manipud idi Nobiembre 2006, agbalin laeng 9 a tawen ken 6 a bulan ti residensiana iti Pilipinas inton Mayo 9, 2016 ket kurang daytoy iti residency requirement para iti kandidato iti kinapresidente.

Mainaig met iti isyo iti pannakipagili ni Poe, kinuna ti Comelec Second Division a maysa a “foundling” ni Poe ket saan ngarud a maikonsidera a natural-born citizen. Iti diksionario, naabandona nga ubing ken saan nga ammo dagiti nagannak kenkuana ti kayat a sawen ti foundling.

Maipalagip nga adopted daughter da Fernando Poe, Jr. ken Susan Roces ni Grace Poe.

Pangrugian laeng daytoy dagiti bangen a masapul nga iwalin ni Poe iti panagtarigagayna iti kinapresidente. Sumangsango pay ti senadora iti disqualification cases nga impila ni dati a Senador Francisco Tatad ken dati a Dean ti University of the East Amado Valdez. Ita, kayat met ni Vice President Jejomar Binay a madiskualipa ni Poe agsipud ta “kasapulan a masurot ti linteg a natural born”.

Ngem kinuna ni Poe a nakasagana a mangirupir iti kalintegan dagiti foundling a kas kenkuana ken ti fundamental a kalintegan dagiti umili a mangpili kadagiti mangidaulo kadakuada.

Umuna laeng a rikus ti pannakaabak ni Sen. Poe. Adda pay dagiti sumaruno a rikus a posible a daleben wenno parmekenna dagiti kritikona a nagipila iti kaso ti diskualipikasion maikontra kenkuana.

Manamnama ngarud ti panagapela ni Sen. Poe iti Comelec en banc ket no awan latta ti gasatna, mabalinna ti agkamang iti Supreme Court.
Ngem agbalin ketdi daytoy a rupakna a pasnaan a pakaasaan ni Poe tapno agbalin a nasaysayaat pay a mangidaulo iti pagilian no isu ti itandudo dagiti umili inton eleksion.#