EDITORIAL: Dagiti big-time smugglers koma ti puntiriaen ti Customs

Naglak-am iti pammabalaw ni Customs Commissioner Alberto Lina gapu iti impaulogna a direktiba a random a pannakalukat dagiti balikbayan boxes kas paset ti kampania ti ahensia nga idauluanna maikontra iti ismagling.

Sumagmamano a senador ti nangkastigar ken ni Lina gapu iti daytoy direktiba nga impaulogna. Uray idi pinadas nga inlawlawag ni Lina a ti pudpudno a puntiria ti random a pannakasukimat dagiti balikbayan boxes ket dagiti freight forwarding companies agsipud ta mapapati nga ipalpalubosda wenno agiliblibasda nga agikabil kadagiti illegal a kontrabando kas iti droga ken armas kadagiti maibiahe a kargamento.

Kinuna ni Sen. Ferdinand “Bongbong” Marcos a rumbeng laeng nga agpadispensar ni Lina kadagiti Filipino nga agtrabtrabaho iti ganggannaet a pagilian agsipud ta namantsaan ti nasayaat nga imaheda.

Agasem ti masuspetsa nga agipuslit iti kontrabando babaen dagiti balikbayan boxes?

Iti bukodmi a biang, masiripmi nga adda rason no apay a nangipaulog ni Lina iti direktiba a maipakat ti random inspection kadagiti balikbayan boxes.

Saan a palimed nga iti kallabes, adda dagiti kailiantayo a nasukalan nga adda nailimed a kontrabando kadagiti kargamento nga awitda iti ipapanda iti ballasiw taaw wenno iti panaggawidda iti pagilian.

Saantayon a dakamaten pay dagiti kailian a nasukalan nga adda nailibas a kontrabando, nangruna iti droga, kadagiti maletada wenno pawit manipud iti kailianda a gapu itoy, ikarkaroda ti basolda (wenno panagliwayda) iti pagbaludan.

Ngem nupay saan a malibak nga adda dagitoy a kakailiantayo, kaadduanna kadagiti balikbayan ti disente ken tao ni Apo Dios, ket mabuteng nga agaramid iti illegal a banag uray matanggayaan iti dakkel a pirak.

Ngem saan koma a dagiti balikbayan boxes ti pakaipokusan ti kampania ti Customs kontra ismagling no di dagiti container vans agsipud ta ad-adu nga amang ti mapukpukaw ti pagilian iti ismagling kadagiti kargamento a maibiahe kadagitoy a lugan.

Segun iti maysa a panagadal nga insayangkat ti Federation of Philippine Industries, nasurok a P1 trillion a sumrek koma iti kaha ti gobierno ti mapukpukaw ti turay iti ismagling. Iti sabali a bangir, aganay laeng a P600 million ti mapukpukaw ti gobierno iti ismagling babaen kadagiti balikbayan boxes.

Ngarud, ayonanmi ti pammaliiw ti maysa a senador a kayarigan ni Lina ti aso nga agtataul iti maysa a kayo gapu iti suspetsa nga adda sagsagannit a maipuspuslit idinto nga iti kaarrubana a kayo, ket ramaram ti ismagling.

Saan ngata nga ammo ni Lina a large-scale ti ismagling kadagiti container vans ket kikit laeng no ar-arigen no maikumpara iti mapukpukaw ti gobierno a panagipuslit babaen iti balikbayan boxes?

Apay a dagiti babassitan a mangmangged a kailiantayo ti pakaiturongan ti napudot a mata ni Lina idinto a nagdadakkelan a tattao ti masuspetsa nga agipuspuslit kadagiti kontrabando babaen dagiti container vans?

Wenno kaamak ni Lina nga adda mabaddekanna a dakkel a tangan ket kalkalubanna laeng ti kinaawan gawayna babaen ti panangipaulogna iti direktiba a maipakat ti random inspection kadagiti balikbayan boxes?

Rumbeng a saan nga agtalinaed iti gobierno dagiti kas ken ni Lina a dagiti laeng babassit a overseas Filipino workers ti kabaelanna a butbutngen.#