EDITORIAL: Dagiti Imbestigasion iti Kongreso

AGARAMID kadagiti linteg para ti sapasap a pagimbagan ti pagilian. Daytoy ti kangrunaan nga akem ken responsibilidad dagiti senador ken kongresista.

Nagkas-ang a pagteng a kasla saan a maamiris dagiti adu nga umili a dagiti agdama a kameng ti Kongreso – ti Senado ken Kamara de Representante – ket kasla saan a prioridad kadakuada ti agaramid kadagiti linteg a mangsolbar kadagiti dadduma pay a nadagsen a parikut ti pagilian.

Kampania kontra illegal a droga ti sentro ti administrasion ni Presidente Rodrigo Duterte. Ngem rebbengna a mabingay koma ti atension dagiti tallo a sanga ti gobierno – ti Ehekutibo, Lehislatura ken Hudikatura – tapno saan a mabaybay-an dagiti dadduma a pakaseknan dagiti umili.

Mapaliiw kadagiti gannuat ti administrasion ket naisentro iti gerra kontra illegal a droga ta saan laeng a ti Executive Branch nga idauloan ni Presidente Duterte ti mangipangpangruna a mangtamtaming kadagiti banag nga adda pakainaiganna iti kampania kontra droga, ngem uray pay ti Legislative Branch a dagiti mangidaulo ket kaaliado ti Presidente – da Senate President Aquilino Pimentel III ken House Speaker Pantaleon Alvarez.

Napateg dagiti congressional investigations tapno makaputar dagiti senador ken kongresista kadagiti nasayaat a linteg. Ngem no kasta a naka-live coverage kadagiti radio and television networks ket mabuya ti panagpipinnasindayag dagiti agim-imbestigar tapno ad-adda nga aglatakda. Nagbalinen dagiti imbestigasion a kasla bista iti husgado.

Nabara dagiti naisaysayangkat nga imbestigasion iti Senate Committee on Justice and Human Rights maipapan kadagiti pannakaabusar ti kalintegan dagiti tattao kas dagiti summary executions wenno extra judicial killings. Nagbalin a kontrobersia ti palawag dagiti naawis a resource persons wenno testigo kadagiti nagkauna nga imbestigasion nangruna ti testimonia ni Edgar Matobato a nangaklon a sigud a kameng ti Davao Death Squad a nangiramananna iti Presidente. Dayta ti nakaigapuan ti pannakaikkat ni Sen. Leila de Lima a Chairwoman ti komite, ken panangsukat kenkuana ni Sen. Richard Gordon.

Sadiay House of Representatives, nabara met ti imbestigasion nga isaysayangkat ti Committee on Justice maipapan dagiti alegasion ti pannakainaig ni Sen. de Lima iti illegal drug trade idi isuna pay laeng ti Justice Secretary. Nabara dagiti testimonia dagiti testigo a sigud nga opisial iti National Bureau of Investigation ken Bureau of Corrections. Kontrobersial met dagiti palawag dagiti testigo a kombiktado a kriminal a balud sadiay New Bilibid Prisons. Ngem adda kadi kredibilidad ti testimonia dagiti kombiktado?

Nagbalinen dagiti imbestigasion sadiay Senado ken Kamara a sentro ti atension dagiti kameng ti media ken dagiti senador ken kongresista. Dakkel a pondo ken taktak dagiti opisial ti gobierno ti maar-aramat kadagitoy nga imbestigasion. Rumbeng a dagita nga imbestigasion ket addanto met laeng nasayaat a pagbanaganna. Maidarumto ngata iti Korte dagiti maitudtudo a nagbasol? Makaputarto ngata ti Kongreso kadagiti linteg tapno saanton a maulit dagiti kasta a dakes a pagteng?

Panunoten koma dagiti senador ken kongresista a malaksid ti problema iti droga, agraraira latta ti terorismo ken nagduduma a krimen. Agtultuloy ti pangta iti riribuk gapu ti susik iti West Philippine Sea wenno South China Sea. Agtultuloy ti problema dagiti mangmangged iti contractualization ken nababa a sueldo. Nakaro ti pangta ti climate change wenno global warming ken pannakadadael ti nakaparsuaan. Nadagsen pay a parikut ti problema ti trapiko kadagiti kalsada iti siudad nangruna sadiay Metro Manila ken dadduma pay a pakaseknan dagiti umili.

Ipangruna koma dagiti senador ken kongresista ti agputar kadagiti linteg a mangsolbar kadagiti nadagsen a problema ti pagilian ta dayta ti nangibotosan kadakuada dagiti umili. Ipaimadan kadagiti maseknan a sanga ti gobierno ti agimbestigar ken mangidarum iti husgado dagiti adda pakainaiganna iti illegal a droga ken dadduma pay a krimen. (Eden Alviar)