Footer

EDITORIAL: Dagiti itta a mangdaddadael iti imahe ti siudad

Kagapgapu ni Nanang Baket sadiay Laoag. Nagsardeng iti tiendaan ta ditoy ti paglugananna nga agpa-Barangay Tamag. Asideg laeng ti pagtaenganna ta adda laeng iti labes ti unibersidad. Mabalinna koma payen a pagpagnaen, isuna laeng ta adda nadagsen a karton a kargana. Dandanin agdalapdap ti sipnget ta nabuntog ti naglugananna sa sumangkautro, naggadu dagiti matartarimaan a kalsada iti amianan a paset ti probinsia.

Nangayab ni Nanang Baket iti traysikel tapno agpaitulod iti Barangay Tamag. Ngem idi makalugan, imbaga ketdin ti tricycle driver nga agnayon iti pagpletena agsipud ta maymaysa a naglugan. Saan nga immannugot ni Nanang Baket. Nakarurod ti agpaspasada ket indissaagna lattan ti baket. Naimbag ta adda simmarsaruno a sabali a traysikel ket daytoy ti nangala ken nangitulod kenkuana.

Alas dos ti parbangon idi sumangpet ni Tata Mario iti Vigan City manipud iti Manila. Sinabat ti maysa nga agpaspasada ket dinamagna no papananna. Imbaga ni Tata Mario nga apan iti San Julian Sur. Singkuenta pesos, kinuna ti agpaspasada. Timmawar ni Tata Mario. Impatengteng ti drayber ti pagpletena. Adda simmangpet a sabali a lugan. Pinanawan lattan ti drayber ni Tata Mario ket sinabatna dagiti dumsaag iti kasangsangpet a lugan.

Kamkamakamen ni Tessie iti klasena iti dayta a bigat. Dimsaag iti parkingan iti tiendaan publiko ket naglugan iti agur-uray a traysikel. Ngem saan met a nagtaray ti traysikel. Kinuna ti drayber nga agurayda pay iti kaduana. Ngem no umannugot ti estudiante nga agnayon iti plete, agluasdan a sigida. Gapu ta maladawen iti klasena, nagtung-ed lattan ni Tessie nupay agtabtabbaaw iti unegna.

Adda pay dagiti traysikelan a damagenna nga umuna no papanam ket no pangadaywen bassit, ipatengtengna a nayonam ti pletem wenno no dina kayat, ipambarna nga adda panna alaen a sabali a pasaherona.

Adu dagiti traysikelan ti saanna nga ammo ti agsupli. No nabukel a dies pisos ti pagpletem, payasyasenna lattan ti luganna a dina ited ti piso a supli. Wenno saan, awan ti bariak, kunana, ket sakbay a makasungbatka, nakaadayon ti luganna.

Sabali pay dagiti agrekrekorida a traysikelan ditoy siudad nga awan ti numeroda. Kaaduanna dagitoy ti agpaspasada iti rabii. Dagitoy pay ti agsingsingir iti nakanginngina.

No apay nga adu dagiti abusado a traysikelan ti narigat a maawatan. Adu metten dagiti naputar nga ordinansa tapno madisiplinaan ida ngem kaskasdi nga agtultuloy ti panagabusoda. Gapu kadi ta dakkel ti grupoda ket kabaelanda a pattogen ti asinoman a politiko a komuntra kadakuada?

Maysan ti Vigan City kadagiti paborito a daydaywen dagiti sangsangaili ken turista. Ar-aramiden amin dagiti agtuturaytayo ti kabaelanda tapno ad-adu pay ti maawis a turista nga umay agpasiar ditoy siudadtayo.

Ngem anian ta adu dagiti abusado nga agpaspasada a mangdaddadael iti ladawan daytoy siudadtayo.

Kasapulan a mapukaw dagitoy nga itta a mangipabpababa iti nadalus nga imahe ti siudad.#