EDITORIAL: Dagiti lobo nga agpampammarang a kas uken

No mannakimisa ti maysa a parsua, saanna a kayat a sawen a nasayaaten ti kinataona. Naggapu daytoy a balikas iti maysa a maraem a tao ni Apo Dios, ti parsua a mangibagbagi iti amin a Katoliko ditoy lubong. Ni Pope Francis.

Nadakamat daytoy ni Pope Francis bayat ti panangmisana iti Saint Martha residence iti Vatican.

Wen, adda di marabngis a kinapudno iti daytoy nga imbatad ni Pope Francis. Lalo ket dinakamatna ti parabola ti ingget saliwanwan ti panagbiagna a tao ken ni Lazarus a kaarrubana nga agpalpalama.

Kuna ni Pope Francis a mabalin a saan a talaga a dakes ti nabaknang a tao ngem nakudrep ti mata ti kararuana ket saan unay a makakita.

Ngem iti biangmi, mamatikami met a naruay dagiti tattao nga agpampammarang nga uken ngem iti kinaagpaysona ket narungsotda a kas lobo.

Kinapudnona, nabayagen a kapaliiwanmi nga adda dagiti agtuturay a mangibambando a napeklanda a kristianno ken ingget dalus ti panagbiagda (kuno) iti rabaw ti daga, ti awan mantsana (kano) a panagserbida iti turay ken kadagiti umili, dagiti mangipampannakkel iti dakkel mait-itedda a tulong, donasion ken kontribusion iti simbaan ken kadagiti balay ti kaasi, ken dagiti mangirakrakurak nga adipenda dagiti umili, ngarud ingget buslon dagiti programada a mangitandudo iti panagbiag dagiti marigrigat, mailupitlupit wenno maipapaigid iti kagimongan. Ngem iti kinapudnona, isuda ti ad-adda a naparaburan ken nagimbag.

Masaludsod: naimbag kadi a kritstiano ti mangibinglay iti sangkailgat nga imbag, sangkapit-ing a pirak, sangkaballing nga ayat, sangkapuling a panangaasi, sangkadilmut a duol kadagiti kaarruba, kailian, kapamilia, kapuso, wenno ania ditan a pangay-ayo a balikas no nagtaud met dagitoy manipud iti panagkaut iti putik ti turay, panangibulsa kadagiti pagbagasan nga agpaay koma kadagiti marigrigat, panangipaidam iti saranay kadagiti agrarasan ti dapanda a mamirmiraut tapno saanda a makaalut-ot iti kapitakan ket agnanayonda a paduduolan ken aglablab iti sangkapit-ing nga imbag iti nakaukrad a dakulap; panangulod iti derraas dagiti kalugaran nga addaan nabagas nga arapaap ken tarigagay nga agserbi agsipud ta makatubengda iti bukod nga interes ken pagimbagan?

“Mabalin a relihioso a tao, iti bukodna a wagas. Mabalin a managkararag ken sumagmamano a daras iti makatawen, sumrek iti templo tapno mangidaton iti sakripisio ken mangited iti dakkel a donasion kadagiti padi, nga iti klerikal a kinatakrotda, agyamanda kenkuana ket ikkanda iti tugaw ti pannakarespeto,” kinuna ni Pope Francis.

Ngem saan a makaanay dagitoy a “nasayaat nga aramid” nga impaayna iti simbaan. Napaay latta ti baknang a mangbigbig iti napanglaw nga agbibiag iti abay ti balayna, kinuna ti Papa.

“No nainlubongan ti puso, makapanka iti simbaan, agkararagka, adu a banag ti maaramidmo. Ngem no ti pusom ket nainlubongan, dimo maawatan ti kasapulan ken pagrigatan dagiti sabali,” kinuna pay ni Pope Francis.

Wen, kasano a maibilangka a nasayaat a tao no kayarigam ti kabalio nga agguyguyod iti kalesa a napiringan dagiti matana tapno ti laeng masanguanan ti masakupan ti panagkitana?#