EDITORIAL: Dagiti mailemlemmeng nga ill-gotten wealth

No ni Senadora Miriam Santiago ti matungpal, rumbeng a mangipakat dagiti bangko kadagiti pamuspusan tapno malapdan ti “pannakagelgel” dagiti kuarta a napaadda babaen iti saan a nasayaat a wagas.

Nasao daytoy ni Santiago iti sanguanan ti korapsion a mapapati a nakainbolbaran dagiti nangangato nga opisial iti gobierno.

Madakamat ditoy ti mapapati a pannakaisawsaw ti tallo a senador mainaig kadagiti pondo ti gobierno nga imbes a maipan kadagiti proyekto para iti pannakaidur-as ti panagbiag dagiti umili, nangruna dagiti marigrigat, mapapati ketdi a naisalat iti bulsa dagitoy nga opisial.

Iti baet ti panangibambando dagiti tallo nga awan ti kinapudnona ti maibatbato kadakuada a pammarpardaya ken pammadpadakes, saan met latta nga agmawmaw ti alingasaw nga adda dagiti nalimed a depositoda iti bangko.

Sabali pay ti agsasaruno nga akusasion a maibatbato ken ni Bise Presidente Jejomar Binay, a pakairamanan payen ti pamiliana a pasig a nabutosan iti nangato a pagsaadan.

Iti kaudian a damag, adda alegasion a bilion a kuarta ti deposito ni Binay ket daytoy ti kayat dagiti kabusorna iti politika a rumbeng a mabusisi agsipud ta mapapati a saan a nasayaat ti pannakapaadda dagitoy a kuarta.

Dawdawaten pay dagitoy a kakontra ni Binay ti panagpirma ti bise presidente iti waiver tapno ipalubos dagiti bangko ti pannakasukimat dagiti deposito ti bise presidente.

Kinuna ni Santiago nga ar-aramaten dagiti korap nga opisial ti gobierno dagiti kabagianda wenno asideg nga associates tapno agtignayda a dummy, fronts wenno nominee. Dagitoy ti mangbuangay kadagiti korporasion ken manglukat kadagiti bank accounts wenno trust funds.

Isuda ti agtignay ken agparang a kas legal a manadier, akinkukua wenno agtagikua kadagiti shares ti korporasion wenno sanikua ti korap nga opisial. Ngem mabaybayadan laeng ti serbisio dagitoy. Kinapudnona, sakbay a maipatugawda a kas manedier, akinkukua wenno shareholders (kuno), adda pinirmaanen dagitoy a resignation letter a mabalin nga aramaten ti aglinglinged nga akinkukua iti aniaman a kanito.

Ngem iti aktual, ti beneficial owner wenno ti korap nga opisial ti pudpudno nga akinkukua ken mangkontrol kadagitoy nabuangay a korporasion wenno naluktan a bank accounts wenno trust funds. Inaramatna laeng ti pamiliana, kabagian, ken associates nga agparang a kasla agtagikua agsipud ta dina kayat nga ipalgak ti kinasiasinona wenno iti pudpudno nga agtagikua, nangruna no dagitoy ket nagtaud iti saan a nasayaat a wagas.

Ayonanmi ni Santiago, a rumbeng a mangipakat dagiti bangko kadagiti panglakagan tapno malapdan ti pannakailemmeng dagiti ill-gotten wealth dagiti korap nga opisial ti gobierno.

Suportaranmi ngarud ti indatagna a gakat a kasapulan a maammuan ti pudpudno a kinatao dagiti manglukat iti bank accounts wenno pannakaideklara ti legal nga entidad a pakainaganan iti maluktan a bank account wenno dagiti beneficial owners a maiyapiring iti nasao a legal nga entidad.#