EDITORIAL: Dagiti sakasaka nga atleta

ITAY Abril 21, maragragsakan dagiti atleta ti Cordillera Administrative Region Athletic Association agsipud ta adda met laengen tapar ti dapanda a mapan makipartisipar iti Palarong Pambansa a maangay iti Tagum City, Davao. Ngem nakaladladingit a napaadda dagiti sapatos, saan a gapu iti suporta manipud iti gobierno a nangangay iti nailian a paay-ayam no di manipud kadagiti addaan managayat a puso ditoy ken iti ballasiw-taaw.

Babaen iti daytoy aglaplapusanan a tulongda, naminsan pay a napaneknekan nga adu dagiti kailian a nalukneng ti pusoda ket madadaanda a sumaranay kadagiti talentado nga ubbing, kas dagiti atleta, tapno maikkanda iti patas a gundaway a rumimbaw kadagiti pagsasalipan.

Ngem karagpin daytoy ti napait a kinapudno a no mainaig iti isports, agkurkurang ti pondo nga ilatang ti gobiernotayo idinto a nalukay ti dakulapna no maipanggep kadagiti proyekto dagiti politiko, aglalo dagiti kaaliadona, uray no di met ngarud makatulong dagitoy iti itatan-ay ti kalidad ti panagbiag dagiti umili, no di ket pangidur-as iti bukod nga interes ken pagimbagan ti politiko.

Nalukaisan daytoy a kinapudno iti pannakaiposte iti Facebook dagiti ubbing nga atleta nga awan ti tapar ti dapanda a simmalip iti athletic meet iti Cordillera. Nagbalin a viral iti internet ti retrato nga imbinglay ni photojournalist Bong Cayabyab no sadino a naibaskag dagiti saka-saka nga atleta a nakisalip iti taray.

Nangrugi ti panagdadarison dagiti tulong idi nangipatulod ni Ida Agunos-Franklin, anak ti maysa a prosecutor iti siudad ngem agnaeden iti USA, iti mensahe: “Kayatko a tulongan dagiti sakasaka nga atleta.”

Nagallaallatiw iti nadumaduma a poste iti Facebook dagiti naayat a tattao a nangidonar iti sapatos para kadagiti atleta.

Saan met a nagpaudi ti University of Cordillera babaen ken ni Vice Presidente Leonard Romasanta Aguinalde, project director ti HELEN (Health, Education, Livelihood, Environment and Nurturance) ket nangidonar iti 1,405 a Tom’s Rubber Shoes ken flip flops nga agbalor amin iti P2.5 million, wenno dua paris a sapatos para kadagiti amin nga atleta ti CARAA delegasion a mapan makisalip iti Palarong Pambansa.

Maysa a propesor a nakabase iti USA, ni Armenia Tabor, ti nangted iti $200 (agarup P9,000.00 iti kuartatayo) a maigatang iti baro a sapatos ken dadduma pay a kasapulan dagiti sangapulo nga inadaptarna a marigrigat nga atleta iti Pinsao Pilot School.

Sabali laeng ti baro a sapatos a maited kadagiti marigrigat nga atleta iti Cordillera kalpasan a makisalipda iti Palarong Pambansa agsipud ta adda nakasagana nga indonar dagiti agassawa a Franklin.

Iti sabali a bangir, maysa a Samaritano manipud iti Washington DC ti nangidonar iti P12,000.00 a maited nga insentibo kadagiti atleta a mangiyalat iti balitok iti Palarong Pambansa. Sag-P3,000.00 ti maited iti atleta iti elementaria ken sekundaria nga umuna a mangabak iti balitok, ken sag-P3,000.00 met para iti atleta a kaadduan iti magun-od a medalia iti elementary division ken secondary division.

Adu pay dagiti nangikari nga agdonarda iti sapatos kadagiti indigent nga atleta babaen ti proyekto a “Share-a-shoe for the Cordilleran Athlete” ken kanayonna a programa nga “Adopt-a- Cordilleran Athlete”.

Wen, Virginia, uray iti sanguanan ti nariribuk ken moderno a panagbiag a pagrarairaan ti kinabuklis, kinagamrud, panagbalin ti pirak a didiosen dagiti korap a politiko, agtuturay ken adda kabaelanna iti biag, makabussog-puso ti iririmbaw pay laeng ti unibersal a panagayat, panagbibinningay ken panagsisinnaray iti kaunggan dagiti mannakitinnulong a kailiantayo. (Salvador A. Espejo)