EDITORIAL: Dakkel a karit iti baro nga AFP chief of staff

Iti panangallawat ni Lt. Gen. Eduardo Oban, Jr. iti responsibilidadna kas kabarbaro nga Armed Forces chief of staff, dakkel a pagrebbengan ti naipabaklay kenkuana iti sanguanan dagiti eskandalo a mapapati a nakaisawsawan dagiti immuna kenkuana a nangidaulo iti AFP.

Saan a mailibak a nagunggon ti natibker a pundasion ti armada a puersa ti pagilian gapu kadagiti alegasion ti pasarabo ken pabalon kadagiti mapili ken agretiro a chief of staff ti AFP. Dagitoy nga alegasion ti ad-adda pay a nangpalidem iti imahe ti Armed Forces of the Philippines ken nangkerras ti panagraem dagiti umili ken ti integridad dagiti disente nga opisial daytoy nga institusion gapu laeng kadagiti sumagmamano a rinuker nga opisial.

Kinapudnona, maal-alimadmaden iti kallabes dagiti saan a makaay-ayo a mapaspasamak iti Armed Forces of the Philippines ngem nagpatinggada laeng iti sayangguseng. Ipetpetteng dagiti naggiggem iti pondo ti AFP nga awan ti uging kadagiti imada iti baet a sabali ti ipadpaduyakyak dagiti dadakkel a depositoda iti bangko ken dagiti dadakkel a balayda ditoy pagilian ken iti ballasiw-taaw.  Ngem kas itay kunadan, awan ti palimed a dinto maibutaktak. Kayariganna ti naluktan a baul ni Pandora a nagalingasawan dagiti bangsit a saanen a nabaelan nga inlemmeng ti maseknan nga opisial uray kasano itan ti panangtakkabna.

Saan ngarud a nakakaskasdaaw a nababa ti morale dagiti nababa a soldado  iti sanguanan ti agdadata a kinapudno a saan a nasayaat ti pannakagamulo ti pondo ti AFP. Agasem, ta arig awan payen ti bala ti daan a paltog ni nababa a soldado, nagdaras a madadael ti unipormena, buttawen ti sapatosna, ken nakiddit dagiti maited a benepisioda, adda gayam a nagmayat ti panagkammel dagiti nakangirsi a nangangato nga opisialda iti kuarta a para koma kadakuada. Saan ngarud a nakakasdaaw nga adda dagiti di makaidna a soldado kadagiti kampoda, adda dagiti di nakaibtur a nangibatad iti saanda a pannakapnek ket nagprotestada iti Oakwood.

Iti pannakapili ni Lt. Gen. Oban, nadagsen ti pagrebbengan a naipabaklay iti abagana. Iti daytoy a panawen  a nababan ti panagkita dagiti umili iti AFP ken iti kinababa ti morale dagiti soldado iti babaenna, kasapulan a pidutenna ti sagad tapno dalusan ken pasayaatenna ti imahe ti institusion nga idauluanna.  Kasapulan nga ipakitana  a maysa a pagwadan a mangipangulo iti AFP, transparensia iti amin nga aramidna, dinanto mulitan ti nadayaw a puestona. Kangrunaanna,  natibker a dadaulo a di bumdeng a mangpugipog iti korapsion iti AFP ken mangiwayat kadagiti reporma ken panagbalbaliw iti daytoy nga institusion.

Nadagsen ti annongen nga agur-uray ken ni Lt. Gen. Oban. Sapay koma ta makapudno iti inallawatna a pagannongan.#