Footer

EDITORIAL: Dakkel nga angaw kadagiti agrigrigat nga umili

Iti umuna nga aldawna pay laeng a simmango kadagiti senador mainaig iti mapapati a nakaisangkotanna a fertilizer scam,  dinalusanen ni dati nga Agriculture undersecretary Jocelyn “Joc-Joc” Bolante ni Pres. Gloria Macapagal-Arroyo.

No patien ni Bolante, pinaruk-atan ti Department of Budget  and Management ti P728 million a pondo a nairanta para iti pannakagatang dagiti ganagan a maiwaras kadagiti mannalon nga awan ti  pannakaibiang ti Presidente.

Regular nga aktibidad ti DA ti pannakaiwaras ti pondo ket saan kano a kasapulan nga alaenda iti pananganamong ni Pres. Arroyo.

Impettengna a saan a nagasto ti pondo para iti pannakaitag-ay iti kandidatura dagiti kandidato ti administrasion iti eleksion idi 2004 sana inyunay-unay a kaaduan kadagiti proyekto ti nayimplementar idi Hunio ken Hulio 2004 wenno nabayagen kalpasan ti eleksion.

Patienyo dagitoy, kailian?

Iti panagparang ni Bolante iti Senado, ad-adu dagiti lumtuad a saludsod ngem sungbat no napanan ti pondo nga agpaay koma kadagiti mannalon ngem agparparang a di dimmanon kadakuada.

No agpayso ti ibagbaga ni Bolante a naaramat a husto ti pondo, ania koma ti gapu a tinarayanna ti ayab ti Senado ket kinaykayatna ti mabalud iti Estados Unidos ken inaramidna amin a legal a pamuspusan tapno di  maipalladaw ditoy pagilian nga agur-uray iti sungbatna kadagiti alegasion nga isu ti arkitekto iti P728 million fertilizer scam? No awan ti ilemlemmengna, apay a di pay la dimmatag idi rimmuar ti kontrobersia tapno dalusanna a dagus ti naganna?

Maipalagip la ketdi ngarud ti moro-moro a pinarnuay ni dati a Comelec Commissioner Virgilio Garcillano idi limtuad ti Garci tape a mapapati a nakaipalaonan ti bosesna a makipatpatang iti maysa a babai a katimtimek ni Pres. Arroyo.

Nagpukaw ni Garcillano ket kalpasan ti mano a bulan a panaglemmengna, limtuad ket iti sanguanan dagiti senador, dinalusanna ti nagan ti Presidente.

Iti panagkitami, awan manen ti pagturongan ti panagparang ni Bolante iti Senate hearing, kas iti napasamak kadagiti immunan a kontrobersia ken anomalia a mapapati a nakaisawsawan dagiti agtuturay ti agdama nga administrasion. Ad-addanto manen nga agtitipon ti alupasi ken nambaan apaman a rugian ti Kamara ti bukodna nga inbestigasion, aglalo ket saan a mailibak a kaadduanna kadagiti agilinlinteg ditoy ti kaaliado ti agdama nga administrasion. Ita pay laeng, mangrugin a malilibeg ti pudpudno a napasamak, no aniaman ti pudno, ket iti panagbayag ti hearing, dinto ammon dagiti umili ti patienda ken saan.

Iti panagkitami, maysa a dakkel nga angaw ti isasango ni Bolante iti Senado.

Awan nagpadaanda iti birngasna a ‘Joc-joc” – doble nga angaw kadagiti umili nga imbes koma a mabenepisiaran iti nasao a pondo ti agrikultura ngem tagtagimmuan no sadino a bulsa wenno nakakeppet a dakulap ti nagturonganna.#