EDITORIAL: Datayo ti mangguyod iti bukodtayo a bangka

Mangrugi ti panagsuitik iti pagtaengan ken uray iti pagadalan.

Kas koma iti panagaramidan kadagiti kasapulan a project dagiti agbasbasa iti siensa, arte, industrial arts wenno home economics. Mapaliiwmi a saan a dagiti ubbing ti agaramid iti daytoy a proyektoda no di ket dagiti nagannnak tapno laeng nangato ti grado dagiti ubbingda. Mabalin a saan nga annugoten dagiti nagannak ngem panagsuitik daytoyen

Adu met dagiti nasikap nga ubbing, agi-downloadda iti internet ket  pagparangenda nga aramidda dagitoy idinto nga agdadata a pinidutda. Panagsuitik metten daytoy ta pagparangenda nga inaramidda ti aramid ti sabali.

Ngem ti makadakes, kaadduanna nga ikidem lattan dagiti mangisursuro nga awaten dagiti proyekto nupay ammoda a saan nga inaramid ti estudianteda ket ikkanda dagitoy iti nangato a grado idinto a saan a maiparbeng ti kasta ken rebbengna koma a putdenda daytoy nga aramid.

Adda met dagiti nagannak a saan a mangideklara iti natgedanda tapno makagun-od dagiti ubbingda iti scholarship. Pagparangenda a marigrigatda idinto a kabaelanda met nga isakad ti panagadal dagiti annakda.

Kapaliiwan pay nga ad-adda a mabutosan dagiti nagannak nga adda kabaelanda iti biag agsipud ta adu dagiti proyekto a maipatungpal no isuda ti mangidaulo. Kas iti maysa nga am-ammomi a presidente, naibutos agsipud ta adda kuartana ken adu dagiti gagayyemna a pagdawatanna iti a  pangpundo kadagiti proyekto ti Parent Teachers Association.

Sumangkautro met dagiti mangisursuro ta panuynoyanda dagiti kastoy nga aramid uray ammoda a mabalin a dagitoy a banag ti pakailiddingan ti nakurapay ngem masirib nga estudianteda.

Naisem pay ketdi dagiti opisial dagiti pagadalan wenno dagiti class advisers nga umawat iti donasion a kuarta, bentilador, karaoke, wenno ania ditan a pangpasayaat iti kuartoda iti baet nga ammoda a posible nga addanto “subalit” dagita a pabor iti panagseserra dagiti klase, aglalo no matinnag iti klase wenno mabitin iti pammadayaw ti anak ti nangted iti pabor ket .

Ania ti implikasion daytoy? Iti maysa a bangir, ibagatayo a masansan nga agbalin dagiti ubbing nga honest ngem dadaelentayo laeng dagitoy a values gapu ta sabali met ti ipakpakitatayo a maaramid.

Kayariganna daytoy nga isurotayo kadakuada a nasayaat ti agsuitik no la ketdi agaramatda iti abilidad. Dayta ti pangrugian iti panangsanaytayo kadakuada iti panagkunniber.

Maiyunay-unay ngarud koma a mangrugi ti pannakirupak iti panagkunniber iti lugar nga adda kontrol dagiti ordinario nga umili kas iti pagtaengan ken pagadalan.

Iti agdama a kulturatayo nga arig naibinggasen iti kinataotayo ti panagkunniber, adda kadi pay rissik a makita iti ungto ti nawatiwat a dalan ni namnama?

Datayo laeng ti makasungbat iti dayta. Kastay kunadan, datayo ti manggaud iti bukodtayo a bangka. Pagturongan ti bangka, datayo  laeng ti makaidalan.#