Footer

EDITORIAL: Daton iti Altar ti Progreso

Madama ti pannakaikalawa ti kalsada iti Rivero Street, Barangay 9, a pakasarakan iti opisina ti Tawid News Magasin ken iti Vigan City Convention Center. No malpas ti embankment a pagnaan dagiti tattao, kayariganto daytoy iti kalsada nasional a pagassisawan dagiti lugan nga agturong iti University of Northern Philippines, Baluarte a pagtaengan ni dati a Governor Luis “Chavit” Singson a pakasarakan iti mini zoo, ken iti Caoayan a nakapatanor iti maysa a presidente iti kinatao ni dati a Presidente Elpidio Quirino.

Maysan a nalatak a venue ti VCCC a pagkukumperensiaan ken pagtataripnongan dagiti dadakkel a pasdek-negosio ken nadumaduma a gunglo agsipud ta nadamdamagda ti kinaisalsalumina ti Siudad ti Vigan gapu kadagiti duog a pagtaengan a bato a naipatakder pay laeng idi tiempo dagiti Kastila.

Kasla uong a nagtubo dagiti pasdek-negosio ditoy a paset ti siudad, kas iti maysa a dakkel a pagtagilakuan, dua nga otel, maysa a bangko, malaksid laeng ti kaadda ditoy ti terminal dagiti minibus ken dyip. Manamnama ti itatakder pay dagiti pasdek a pammaneknek iti panaglupos daytoy siudad a maibilangen a maysa kadagiti tourist destination iti Amianan.

Iti pannakaibutos ti Vigan a maysa kadagiti pito a baro a pagsidsiddaawan a siudad iti sangalubongan, manamnama ti panagdadarison ditoy dagiti ganggannaet a turista tapno agpasiarda iti siudad a maikatlo a kadaanan a lugar iti sibubukel a Pilipinas, kas iti napasamak iti Palawan idi naideklara a maysa kadagiti New7Wonders of Nature.

Ngem iti panagbalin ti Vigan a maysa a New7Wonders Cities of the World, adda la ketdi dagiti maidaton iti nagan ti progreso kas iti pannakaipaigid ti simple a panagbiag ken kinaulimek ditoy a lugar, maysa kadagiti gupit a pagsublisublian dagiti turista nga agpaspasiar ditoy ta kas kunada, kayatda a nanamen ti klase ti panagbiag ditoy idi nasurok uppat a gasut a tawenen ti napalabas, kangrunaan iti Heritage Village a pakasarakan kadagiti kadaanan a pagtaengan.

Ngem ibilangtayo daytoy a napnuan kaipapanan a daton iti altar ti progreso agsipud ta isangbay dagiti panagbalbaliw ti naprogprogreso pay a panagbiag dagiti agnaed iti Vigan.#