EDITORIAL: Daydi simple a panawen

Ita a sursuratenmi daytoy, addakam iti basement ti Saint Paul College, Pasig nga agur-uray iti pannakalpas ti eksamen ti kakaisuna nga apomi a babai. Adda ni Niknik iti maikadua a tukad ti primaria. Sakbayna, nagturpos iti grade school iti Britespark, maysa a pribado a pagadalan a kaaduan nga estudiante ket ganggannaet.

Bayat ti panaguraymi iti basement a canteen (ditoy ti paborito a paggianan dagiti nagannak nga adda itulod ken sukonenda nga annakda), diak malapdan ti yaagibas iti panunotko ti napalabas a simple laeng ti panagbiag, daydi panawen nga idi ubbingkami pay, adda la ketdi nikel (lima sentimo) a balonmi a mapan agbasa, kasta unayen ti ragsakmi. Saan a patien dagiti ubbing tatta a kasta kabassit ti balonmi ta iti agdama ket kurang pay ti sangagasut a pisos a balonda iti inaldaw, aglalo dagiti agbasbasa iti publiko a pagadalan. Ngem kasano a patien ti apomi dayta ket itulod ken sukonen ti kotse a ti mismo nga inana ti mangmaneho iti inaldaw a panagbasana?

Dimi maaluadan ti agsennaay no kasta a malagipmi ti napalabas, daydi a panawen a simple ti panagbiag, daydi panawen a narigat man nga annugoten ket saanen nga agsubli pay iti sanguanan ti moderno a sibilisasion a rumimrimbawen ti komersialismo ken materialismo.

Wen, kail-iliwmi daydi simple a panagbiag, a nupay makurkurangankami iti material a kasapulan, nairut ketdi ti patapat ti panaglalangenmi iti uneg ti pagtaenganmi. Iti pagtaenganmi, rumimrimbaw ti respetomi kadagiti dadakkelmi, panagayatmi iti tunggal maysa, madadaan nga agsisinnaray ken agtitinnulong ken agsakripisio para iti pagimbagan ti maysa.

Narigat ti panagbiagmi idi ta nasapakami a naulila iti ama, ken maysa laeng nga aglaklako iti ikan iti tiendaan ti dakkelmi a babai. Ngem awan ti mariknami a panagpulkok iti let-ang ti kinakurapay a pagpuspusiposanmi. Mabalin a gapu iti kinainosentemi pay iti daytoy paggargarawanmi a lubong. Mabalin a gapu ta simple laeng ti arapaapmi kadaydi a tiempo: mangankami la ketdi iti mamitlo iti maysa nga aldaw, adda bassit a pagsasanguanmi no agkasangaykami wenno adda bassit a regalomi, uray kasano kanumo, no adda pasken a sumangbay kas iti Paskua wenno Baro a Tawen.

Ita, panagriknami, ganggannaetkamin iti agdama a panawen. Sabalin ti lengguahe dagiti ubbing, naaliandan iti kaugalian ti Lumaud. Agrikrikusdan iti babaen ti moderno a teknolohia, kas iti kompiuter, tab, selpon, Facebook, Youtube, Twitter, Instagram, selfie, groupie, ken no ania ditan a moderno a gadget.

Ngem annugotenmi man ken saan, nupay adayokamin iti kalman, pasetnakami pay laeng ti agdama ken pasetnakamto pay ti masakbayan.

Ta awan ti masakbayan no awan ti agdama ken iti napalabas.#