EDITORIAL : Delikadesa, nagturongam a disso?

Maysa a saguday a mapaliiwmi a pagkamtudan dagiti sumagmamano nga agtuturaytayo ti delikadesa. Kinapudnona, daytoy ti makitami a maysa a makagapu no apay nga adda dagiti mapaspasamak nga anomalia, panagkunniber ken kinaruker kadagiti nadumaduma nga ahensia ti gobierno.

No pampanunoten, daytoy kinaawan ti delikadesa ti ramut ti saan a panagkinnaawatan ti ehekutibo ken ti hudikaria a nagtungpal la ketdi ngarud iti pannakausig ti maysa a mahistrado ti korte babaen ti impeachment court, umuna a gundaway iti pakasaritaan ti pagilian.

Taldiapantayo ti napalabas. Idi 1998, idi bise presidente pay ni agdama a Congresswoman Gloria Arroyo, dinutokanna ni Corona a chief of staff ken spokespersonna. Idi nagbalinen a presidente ni Arroyo idi 2001, dinutokanna ni Corona a presidential chief of staff. Idi 2002, impatugawna nga associate justice iti Korte Suprema. Ket idi 2010, sumagmamano a lawas sakbay ti ibababana iti puestona kas presidente kalpasan a nangabak ni Benigno Aquino III a presidente iti eleksion, inapointaranna ni Corona a chief justice.

Iti daytoy nga inaramid ni Arroyo, naglak-am la ket ngarud kadagiti pammabalaw agsipud ta por delicadeza maited koma metten a bien iti agtugaw a presidente ti pannakadutok ti sumaruno a chief justice. Kasta met a por delicadeza, saan koma met nga inawat ni Corona daytoy nga indiaya ni Arroyo, nupay daytoy ti alimpatok nga arapaap tunggal hues. Kadagiti kritiko ni Arroyo, impasagidda nga impatugawna ni Corona tapno adda mangsalaknib kenkuana kadagiti kaso a maisaklang maikontra kenkuana no bumabanton iti puestona. Ngamin, bayat ti panagtakemna, limtuad dagiti anomalia a mapapati a nakaisawsawanna ken ti pamiliana kas iti ZTE broadband deal, fertilizer scam, ken dadduma pay, kasta met iti mapapati a pannakairamramanna iti panagsuitik idi eleksion ti 2004 ken 2007 kas naibutaktak iti Hello Garci scandal.

Saantayon a dakamaten ditoy dagiti kapaliiwan a panangpabpabor ni Corona ken ni Arroyo, a ti kaudian, ti panangiyetnag ti Korte Suprema iti temporary restraining order iti hold order ti Department of Justice nga agbiahe dagiti Arroyo iti baet nga adda dagiti kondision sakbay a maited daytoy.

Kadagiti agilinlinteg iti Kamara, pammatalged dagitoy a pudno ti suspetsada a naipuesto ni Corona kas salaknib ni Arroyo kadagiti kaso a maisaklang maikontra kenkuana.

Ita, kayat man wenno saan ni Corona, masapul a sanguenna ti impeachment complaint maikontra kenkuana. Ket iti daytoy a kasapana, lumtuaden dagiti saan a makaay-ayo a denggen maipapan kenkuana. Iti daytoy a mapaspasamak, uray no maabsuelto ni Corona iti impeachment court, napukawen ti kredibilidadna a mangidaulo iti Korte Suprema.#