Footer

EDITORIAL: Di garawen no di nasisita

Lalo pay a timminggaw ti alingasngas ti umas-asuk a saritaan ti charter change wenno pannakabalbaliw ti sibubukel wenno sumagmamano a paset iti constitution. Mayabyabyaban ti agsublisubli nga isyo a nagadu ti mayat a sumakay – nagandat idi panawen ni nag-Presidente Fidel V. Ramos a nakasiripanda iti 97 nga amendments wenno pannakabalbaliw ken ti napalabas nga administrasion ni Presidente Gloria Macapagal-Arroyo a nakakitaanda met iti 147 a rumbeng a mabalbaliwan.

Economic reforms dagiti rason. Ngem iti panagkitami saan pay met a nadadael ti agdama a panangidur-as ti ekonomia. Saan pay met a nagsuek ti ekonomia no di ket timmayok pay.

Saan a nasisita a tamingen wenno maaramid iti dinnadarasudos nga addang ti rason a panangipaay kadagiti ganggannaet nga investors iti panagtagikua iti 100% ti daga ken negosio nga ipatakderda  ta mangibunga daytoy iti dakkel unay a pagbabaywan no saan a maannadan. Nasken ti naun-uneg a panangamiris ken nasken a maidatag amin dagiti balido a rason tapno maadal ken matingiting dagiti pagsayaatan ken pagdaksan dagitoy.

Nupay napintas ti panggep nga amendments iti konstitusion, saan pay koma nga ita. Saan nga isu ti prioridad a tamingen ta ad-adu pay dagiti nasken a pagtuonan iti imatang. Unaen dagiti nasisita a banag sakbay a tamingen ti saan pay unay a kasapulan. Awan ti makitami a nadagsen a rason tapno isu koma ti mataming.

Iti panagkalap laengen iti three-fourth votes iti Kongreso tapno aggunay daytoy ket makitami a nalidem. Saan a namnamaen ti suporta ti administrasion ni Pres. Benigno Simeon Aquino III ta kas ti nakunana: “Don’t fix what ain’t broke,” Saan pay nga istimaren ti saan pay a nadadael. Nalawag la unay a saan a panangayon ti pagtaktakderan ti Malakaniang.

Adu dagiti nasnasken  nga unaen a tamingen. Kas iti deliberasion para iti masungad a badiet 2013, dagiti isyo maipapan iti territorial dispute iti Scarborough Shoal iti West Philippine Sea, dagiti mapaspasamak a peace negotiation kadagiti MILF ken ti CPP-NDF-NPA, unemployment, massive overseas migration ken dadduma pay a nasken unay nga unaen a tamingen.

Saan a magun-odan ti kapkapnekan a resulta no itoy a tiempo ti panangtaming itoy nga isyo ta ti masungad nga eleksion ti kangrunaan a takderan ken sanguen dagiti agpampanday linteg lalo dagiti pailayon. Saan a maala ti pudpudno a simpatia wenno kapkapnekan a timek no kabayatan ti panangisikkir ti pagtaktakderan ket sabali pay nga ima ti pumaypayapay wenno nakasallabay kadagiti botante.  Mausar laeng daytoy nga isyo iti grandstanding lalo dagiti pabutosan a politiko.

Aramid a manakman ti panangpidut nga umuna kadagiti kangrunaan a kasapulan; ngem ti kasunganina ket agbunga iti pakaulawan no di man pakadadaelan.#