EDITORIAL: Di nasayaat nga imahe ti impaay ti surgical scandal iti medical community

Saan a  nasayaat ti imbunga ti Vicente Sotto Memorial Medical Center (VSMMC) surgical scandal iti medical community ditoy pagilian.

Dakes a senial ti inted dayta a panangaramid dagiti dodoktor itoy nga ospital a nakakatkatawa ti pasienteda nga inoperada a nabuya ti sibubukel a lubong babaen ti YouTube. Pananglabsing iti professional ethics ti napasamak. Saan laeng a dagiti nagbiddut a doktor ti nagsagaba itoy  nga  inaramidda no di pay dagiti amin nga adda iti medical profession iti pagilian ta  naipinta iti panunot dagiti nakabuya ti kinaawan ti panangipateg dagiti dodoktor ditoy pagilian iti propesional nga etika iti panangipatungpalda iti pagrebbenganda.

Napateg la unay ti etika. Iparangarangna ti kinangato ti agpang ti adal. Daydiay adal a saan a  bastabasta no di  mabalin nga itangsit ti kalidadna  wenno  ipannakkel iti sabali a nasion.

Ngem gapu iti napasamak, timmaud la ketdi iti panunot dagiti nakabuya, aglalo dagiti adda iti medical community iti sabali a nasion ti kinababa ti professional ethics dagiti doktor ditoy pagiliantayo. Naparnuay la ketdi ti panagsarimadeng ken panagduadua dagiti addaan an-anayen nga agpanggep nga umay agpaagas iti pagilian. Maapektaran dagiti medical professionals ditoy pagilian a mapan agtrabaho iti ballasiw-taaw ta saan a masasaan a bimmaba ti panagkita dagiti ganggannaet iti kredibilidad ken etika dagiti dodoktor ditoy.

Kasta unay ti panagpungtottayo iti maysa a tv show a nangibagaan ti maysa a character  ditoy a dina kayat ti doktor manipud iti Filipinas gapu iti suspetsana a posible a produkto ti diploma mill. Ngem gapu iti napasamak, posible a pinatalgedanna dayta dakes a panirigan wenno pattapatta. Gapu itoy a pasamak, makuna la ketdi dagiti adda iti likudan ti nasao a TV show nga addan pagibasaran iti alegasion a nadakamat idi iti maysa nga episode. Nagtauden a mismo iti pagilian ti rason.

No maminsan ngamin, iti iyaaddangtayo, saantayo a taliawen ti pagnaantayo isu a mabaddektayo ti ulo ti sabali wenno maitibkoltayo. Itoy nga iskandalo, nagsagrap iti pannakaibabain saan laeng a ti biktima a naoperar no di pay ti sibubukel a komunidad ti medisina ditoy pagilian.

Tapno maliklikan ti pannakaulit ti kas itoy a napasamak,  agpanunot koma nga umuna dagiti maseknan sakbay ti yaaddangda. Saanda koma nga agpanunot para iti kabukbukodanda laeng bagi wenno bukodda nga ego no di ket iti pakairanudan ti amin ta daytoy ti maitutop nga aramid.

Agbiddut met dagiti propesional. Agbiddut met dagiti doktor. Wen, taoda laeng. Ngem maliklikkan  dagitoy a panagbiddut babaen ti panangamirisda ken panagannadda kadagiti iwayatda nga addang.

Maited koma ti hustisia iti biktima. Saan laeng koma nga agpatingga iti media  ti panagpalutpot dagiti maseknan nga agtuturay no di makita ti kaadduan ti pannakadusa dagiti nagbasol tapno maallangon ti pannakarugit ti nagan ti sibubukel a medical community.#