Footer

EDITORIAL: Dika maturog iti pansitan, Amianan

Ti BPO wenno business process outsourcing, gagangay a maawagan a  trabaho kadagiti call center, ti maysa a dakkel a mangipapaay iti trabaho ken nasayaat a panueldo. Umaboten iti 650,000 dagiti naiyimpleo itoy a kaaduanna ti agedad iti 20s-30s. Ti pagilian ti nagbalin a kangrunaan a BPO hubs iti deppaarna ti rehion a naagawna manipud iti India.

Sipud pay idi napalabas a dekada pinasaranta ti BPO ti kutikusi ti trabaho iti Metro Manila, Clark (Pampanga), Baguio, Subic (Zambales) ken dadduma pay. Sadiay Visayas, nairugi sadiay Iloilo ti panagwarasna. Ita, nakadanonen sadiay Davao. Itay laeng nabiit, timmakder sadiay Sta. Rosa, (Laguna—ti maaw-awagan iti Makati iti Abagatan) ken kadagiti probinsia ti Rizal ken Bulacan.

Daytoy koma ti pakigamuluan ti Amianan ta kasla naikapis manen. Kasla nalibtawan manen ti deppaar iti gunay ken parasapas daytoy a panggedan.

Amianan, umilgatka met, dika maturog iti pansitan! Kasapulan a sumurotka met iti ipus ti parasapas tapno mairanudka iti pagsayaatan.

No apay a saan nga agpaamianan dagiti danapeg, adda la ketdi rason. Daytoy koma ti takuaten dagiti mangrienrienda iti turay iti Amianan. Nasken ti panangiwayat iti pangay-ayo tapno maawis ti imatang dagiti agpupuonan wenno dagiti IT-BPO locators a mangitakder kadagiti hubs iti Amianan. Nalawag a mangngegan-agal-allangogan ti timek ti global leadership ti BPO industry ti pagilian iti sangalubongan, ket umad-adu dagiti locators nga umay agpuonan ditoy. Kas iti maripripirip a masakbayan ti industria, ad-adunto pay ti maiyemplo ditoy ngem ti bilang dagiti OFW. Daytoy ti mapekpekkelan nga industria a mangipanaw ti pagilian iti kasasaad a Third World.

Addaantayo iti naisangsangayan a talugading, ti pannakaawat ken pannakasao iti English nga isu ti kangrunaan a kualipikasion dagiti amin a mayat nga agtrabaho itoy nga industria. Ken kangrunaanna, saantayo nga illiterate no maipapan iti information technology ta ultimo dagiti ubbing ket nalaingdan nga agusar iti internet.

“Through BPO, Philippines will be the powerhouse of the global economy in a few years because it is a magnificent place to supply people who are great workers when it comes to software,” kinuna ni Martin Conboy, president of the Australian BPO Association. Innayon pay ni Conboy nga agdoble ti bilang dagiti maiyimpleo itoy iti sumaruno a dekada. Iti agdama a bilang a 650,000 agarup  agbinnitibitdanton iti OFW iti panangiserrek iti trabaho ken doliares iti pagilian.

Kas iti nakunamin, dika koma a maturog iti pansitan, Amianan. Amangan no nakatangkayagton ti init ket tallo kapikon pay laeng kukotmo. Siggawatem ketdi ti tiansa a makipaggamulo itoy nga industria a nakananama a mangitakder iti narangrang-ay a panagbiag.#