Footer

EDITORIAL: Dimi ayonan decriminalization ti libel case

Kadakami a biang, dakdakkel a peggad ti itden ti pannakaikkat ti libel case a kas kriminal a kaso ngem ti sumango ti broadcaster wenno journalist iti libel case. No madecriminalized ti libel case, awanen ti sabali pay a gammatan ti subject no di agibales babaen ti bukodna a pangngeddeng, ket karamanen ditoy ti pammapatay. Agsipud ta saan a makadarum, adda la ketdi tendensiana nga umasideg kadagiti hired killers wenno kadagiti badigardna  wenno isu a mismo ti mangiwayat iti pammapatay.

Ngem no adda pay laeng ti libel case, ad-adu met ngata ti mangibalakad kenkuana a nasaysayaat wenno mas sibilidad ti panagdarum ket ti korte ti mangeddeng no libelous in nature ti naisurat wenno saan. Maliklikan no kuan dayta ad-adu pay a panagparti.

Asino ti agbuteng iti  libel case? Karamanen daytoy a peggad iti trabaho ti broadcaster ken journalist. Sakbay a sinerrekda daytoy a trabaho, namnamaendan nga iti maysa nga aldaw, sumangoda a sumango iti kaso a libelo aglalo no adda nabaddekanda a tangan iti panangibrodkasda wenno panangisuratda iti kinapudno.

Ngem makunami: iti kaanoman, saanto nga agballigi ti libel case no agbatay iti kinapudno ti sinurat ken awanen ti sabali nga insurat no di kinapudno laeng.

Asino ngarud ti mabuteng iti libel case? Apay a mabuteng ni broadcaster ken journalist no agsasao ken agsursurat iti kinapudno?

Ad-adda a mamatikami a maisaknap ti responsible reporting iti panagtrabaho. Kasapulan unay ti professional ethics wenno professionalism iti trabaho. Liklikan koma ti bukod nga interes. No la ketdi adda dagiti pagibasaran ken pagbatayanna  ken agsadag iti kinapudno amin nga inwaragawag wenno insuratna, ania ngarud ti pagbutngan ti maysa a broadcaster wenno journalist?

Ti kinapudno ti armas ti media a mangisalakan kenkuana iti libel case. Saanto a maikuspil ti agsasao iti kinapudno ta rummuar ket rummuarto latta ti kinapudno. Ti kinapudno ti mangwayawaya kadatayo, saan kadi?

Isu a makunami, sakbay ti decriminalization ti kaso a libelo, maadal, matimbang ken maamiris koma a nalaing dagiti epektona. Saan koma a maisaruag ti dinnarasudos tapno di tumaud ti ad-adu pay a pannkadangir dagiti agiwarwarnak. 

Ayonanmi met ti memorandum circular  ti Korte Suprema a panagmulta laeng ti dusa ti libel case imbes a pannakabalud. (JMA, Jr.)