ITAY AGOSTO 5, nasaksiantayo dagiti pinullo ribu a tattao a naglilinia kadagiti kalsada a dalanan ti lugan a nakaikabilan ti lungon ni dati a Presidente Cory Aquino tapno imatanganda uray iti apagbiit laeng ti simple nga agtagtagibalay a maibilang itan nga ina ti demokrasia. Nasaksiantayo dagiti rinibribu a kailiantayo a saan a nangitaltalek iti bannog ken bisinda tapno makipagtulodda kenkuana iti Manila Memorial Park a pakaitabonanna, iti denna ti tanem daydi kaingungotna a dati a senador Benigno Aquino Jr..
Kaarngi daytoy ti sabali pay a pamunpon, ti pannakaipumpon daydi nag-senador Benigno Aquino, Jr. idi 1983. Rinibribu met laeng dagiti tattao a nangitulod ken nangpadaan iti lungonna nga agturong iti pakaitanemanna iti baet nga iti daydi a panawen, adda ti pagilian iti sidong ti Linteg Militar ni daydi nag-Presidente Ferdinand Marcos.
Iti pannakapapatay ti asawana, naipabaklay ken ni Cory ti dina ninamnama nga annongen, ti panangidaulona kadagiti komunkontra iti administrasion daydi Marcos. Naiduron daytoy simple nga agtagtagibalay a namagkaykaysa iti oposision ket isu ti nagbalin a sentro ti puersa tapno bumileg ken pumigsa dagiti timek a nangiyikkis iti pannakaisubli iti demokrasia iti pagilian.
Bimtak dayta naleplepan a rikna iti rebolusion ti Edsa idi 1986. Napadisi ti maysa a diktador ket naipatugaw ti maysa a simple nga agtagtagibalay.
Malaglagip ti administrasionna a panagturay ti maysa a pangulo nga awan ti ammona iti politika a namin-ano a gininggined dagiti nagsasaruno a kudeta nga ad-adda a nangilumlom iti ekonomia iti pagilian. Ngem impakita daytoy a babai a nupay nalap-it laeng, addaan iti pigsa ken tured-pakinakem a saan a kabaelan a parukmaen ti paltog ken kinadamsak. Babaen ti lideratona, naputar ti maysa a konstitusion a nangipasdek kadagiti garantia tapno naan-anay nga agsubli ti pagilian iti sidong ti demokrasia ken saanen a maulit pay ti panagturay babaen ti Linteg-Militar.
Nupay kabangbangluanna pay laeng, mabalin koma a nagpailayon ngem bimmaba iti puestona kalpasan ti naituding a panagtakemna tapno sumublat ti sabali a mangituray iti pagilian. Kenkuana, panagserbi ti kaskenan, saan ketdi a pannakaaramat ti puesto tapno mapatalinaed ti bileg ken ambision ti maymaysa wenno sumagmamano laeng a tattao.
Nupay adda dagiti nakababalawanna a kas Pangulo, saan a pagduaduaan ti kinasinsero ken kinadalus ti pusona a nagserbi kas dadaulo iti daydi a panawen a saan a natalingenngen ti ekonomia ken politikal nga atmospera iti pagilian. Iti sanguanan dagiti anomalia ken kinaruker nga agraraira iti aglawlawna, nagtalinaed a saan a namulitan ti imana ken ti prinsipiona.
Iti daytoy nga ipapanawna, napukawan ti pagilian iti maysa a boses. Kangrunaanna, napukawantayo iti maysa a maipagpannakel nga ina a saantayo nga ibain iti iyikkis iti sangalubongan a nangkibin kadatayo tapno mapasublitayo ti nademokrasiaan a panagbiag.
Dios ti agngina, Presidente Cory!
