EDITORIAL: Dua a Ladawan ti Biag

ITAY NABIIT, naibaskag iti Facebook ti ladawan ti maysa nga ubing nga agsangsangit bayat a nakatugaw iti bangketa, iggemna ti styrobox a nakaikabilan dagiti lakona a pandesal.

Ngem natukay ti imatang dagiti umili idi maammuan ti gapuna nga agsangsangit: nahold-ap ti ubing ket nakurimes ti naglakuan daytoy a P200.00.

Itoy a panawen a saan laengen a minilion no di pay bilion ti mataktakaw iti kaban ti gobierno a dagiti pay makuna a mararaem a tattao, matangtangad iti kagimongan, dagiti maitudtudo a nangikaut iti imada iti pagbagasan ti pagilian tapno ad-adda a bumsog ti bulsada ken manayonan pay ti aglaplapusanan a kinabaknangda, kayarigan ti P200.00 a naglakuan ti ubing iti baria, siping-siping a kunada, ngem dakkel ti kaipapananna kadagiti marigrigat, nangruna iti maysa nga aglaklako iti pandesal.

Agasem, nagling-etanna ti P200.00. Natgedanna iti panagisursorna iti lakona, iti baet dagiti agsasallupang a luglugan, ken iti asimbuyok dagiti nangisit nga asuk nga ibelbel-a dagiti sasakayan dagiti babaknang. Ken ni aglaklako iti pandesal, balitok ti kaipapananna ti naglakuanna. Mabalin a bassit laeng ti maganansiana iti dayta a naglakuanna, ngem dayta bassit a kantidad ket makagatangen iti maysa a kilo a bagas ken sardinas wenno pansit nga iyawidna tapno adda taraon ti pamiliana.

Ngem iti dayta a pannakahold-apna, saan laengen a ti naglakuanna ti napukawna, agabuno payen. Imbes a makatged piman, makautang pay iti nangalaanna iti lakona ket no manonto nga aldaw nga ikarkarona.

Saan ngarud a nakakaskasdaaw a nangrikna dagiti rinibu a nakakita iti dayta agsangsangit a ladawan ti natakawan nga aglaklako iti pandesal, ti posible a mangilunod pay iti agdama a mapaspasamak iti pagilian. Ta adtoy ti ladawan ti maysa nga ubing a disente nga agsapsapul iti pagbiagda, ngem takawan pay laeng ti awanan konsensia, idinto a ti sabali a ladawan a makitkita iti inaldaw iti pagiwarnak, dagiti agparparang a disente a tattao nga adda iti koridor ti bileg ken turay ti maitudtudo a nagtakaw wenno nangkurimes kadagiti pondo ti gobierno nga agpaay koma kadagiti programa ken proyekto a mangitag-ay iti biag dagiti umili, nangruna dagiti marigrigat.

Ah, ditoy laeng Pilipinas a mapasamak daytoy. Nakaladladingit nga annugoten a kayariganen ti pagilian iti maysa a nasamek a sementado a kabakiran a pagrarairaan dagiti nadawel ken nakuspag nga ayup ket adda laeng a maiwalwalin iti dalan dagiti nakapsut.
Itay nabiit, naidiario a mairaman ti pamilia ti nahold-ap nga ubing nga agbalin a benepisario iti 4Ps. Mabalin nga adda pagsayaatan daytoy ngem maibilang daytoy a band-aid solusion. Temporario laeng ti ipaayna a pakagin-awaan.

Naun-uneg ti ramut ti kinakurapay iti pagilian.

Adu dagiti umili a mangikarkarigatan iti agbiag babaen iti disente a wagas. Dagitoy koma ti tulongan ti gobierno, ti maaddaanda iti uray bassit a pamataudanda iti pirak a saanda lattan nga agpanpannuray iti gobierno, kas iti programa a 4Ps.#