Footer

EDITORIAL: Dur-as ti ited ti padanum

Itay nabiit ti panangipadas ti National Irrigation Aministration Provincial Office (NIA) kadagiti tallo a dadakkel a makina ti Banaoang Pump Irrigation Project (BPIP) a masarakan sadiay Barangay San Mariano, Bantay, Ilocos Sur  kas kiniddaw ti NIA central office no epektibo met laeng daytoy iti nakaisangratanna a pasayak.

Iti panagsusop ti BPIP iti danum iti Karayan Abra iti Banaoang aglasat ti danum iti 1.4 kilometers tunnel, 87 kilometers main canal ken lateral canals, 310 kilometers main and supplementary farm ditches, 170 a kilometers a drainage canals ket manamnama ti panangpasayakna iti 6,312 nga ektaria a pagtatalonan ken kabangkagan a pakabenepisiaran dagiti 5,334 a pamilia iti Bantay, Vigan City, Caoayan, San Vicente, Sta. Catalina, San Ildefonso, Sto. Domingo, ken Magsingal. Addaan met daytoy iti 87 kilometers a kalsada para iti operation ken maintenance.

Manamnama nga ipaay ti proyekto ti dakkel a dur-asan ti probinsia ta umadu la ketdi ti maapit kadagiti pagtatalonan iti umuna a distrito. Mairanud pay dagiti kadarapatda nga il-ili ken kabangibang a probinsia gapu ta sigurado a rumegta ti komersio ken negosio.

Manamnama ti 72,900 metric tons a milled rice iti tinawen iti panagandar amin dagiti pito a makina ita a bulan ti Hunio.  Saan laeng nga umadu ti apit a pagay no di pay dagiti natnateng lalona iti ili ti Sta. Catalina, San Vicente, Bantay ken Vigan nga agmulmula kadagiti repolio, cauliflower, sili-taban ken dadduma pay a nateng.

Dakkel unay nga addang iti dur-asan daytoy a proyekto nga agpateg iti P2.8 billion nga utang manipud iti pagilian ti China a nairugi idi 2003.

Kalpasan ti pangipadas kadagiti tallo a dadakkel a pump, iyawatton ti China Constructional and Agricultural Machinery Export and Import Corporation (CCAMEIC) iti NIA provincial office ti pannakamanehar daytoy a proyekto.

Marisrisut metten dagiti sumagmamano a kaso ti right of way a nagnaan dagiti kanal ti pasayak  ken  impasigurado ni Diputado Ronald V. Singson iti umuna a distrito ti Ilocos Sur ti naannayas a pannakaresolbar dagitoy timmaud a parikut.

“A problem regarding the unpaid right of ways of the irrigation canals is presently settled by the project management office,” impasigurado ni Singson. Dayta ti mangpunas kadagiti panangipapan a saan a masolbar dagiti parikut dagiti nadalanan a sanikua. Napateg la unay ti pannakaurnos daytoy tapno awan dagiti tumaud a susik ken parikut iti masakbayan.

Mamatikami a dakkel unay ti maitulong daytoy proyekto ti padanum kadagiti mannalon iti umuna a distrito ti Ilocos Sur. Ta kas impaganetget ni Presidente Gloria Macapagal-Arroyo iti ibibisitana iti probinsia, “We need to fast tract the completion of this pump irrigation project because this will address the perennial problem of agriculture sector on insufficiency of water for growing crops and at the same, this project will mitigate the effect of the El Niño in the province.”

Mamatikami a dagiti kastoy a proyekto ti ipaayan koma ti gobierno iti naan-anay nga imatang para iti panagdur-as ti agrikultura ditoy pagilian. Maysa a pagilian nga agrikultura ti Pilipinas ket rumbeng laeng a daytoy ti prioridad a suportaran ti gobiernotayo.#