EDITORIAL: Espiritu ti Paskua

NAGDARAS ti panaglabas ti panawen gapu ta iti kaadu dagiti nagduduma a pakakumikoman dagiti Pilipino ita a tawen ket saan a napupuotan a timmapogen iti Panawen ti Paskua, ken agsukatto manen ti agdama a tawen.

Nakalalagip ti 2016 kadagiti Pilipino gapu ta idi laeng Mayo a naisayangkat ti National and Local Elections a namagdadasig iti prinsipio, kapanunotan ken pagtaktakderan dagiti Pilipino. Natalna ti pakabuklan ti napalabas nga eleksion, ngem saan a mailibak nga adu dagiti napasamak a pagteng a nangparnuay iti nauneg a sugat kadagiti nagsasalisal a kandidato ken dagiti panatiko a pasurotda. Pito a bulanen kalpasan ti eleksion ngem saan pay a naglumen ti nauneg a sugat a pinarnuay ti politika.

Saritaen man dagiti dadduma a nangabak nga opisial a kalpasan ti eleksion ket linipatdan dagiti dinnadael ken kinnusitan idi kampania ken eleksion. Ngem dagitoy a balikas ket pammarang laeng tapno maipakita iti imatang dagiti umili nga isuda ket nasayaatda a lider.

Daytoy ti umuna a Paskua kadagiti kabarbaro a nabutosan nga opisial ti gobierno idi Mayo. Adu kadakuada dagiti kabarbaro kadagiti posisionda kas kada Presidente Rodrigo Duterte, Bise Presidente Ma. Leonore Robredo, Senate President Aquilino Pimentel III, House Speaker Pantaleon Alvarez ken dadduma pay nga opisial. Tarigagayan dagiti umili a sapay koma ta iti daytoy nga umuna a Paskua iti baro nga akem dagiti opisial ket maiyanninawda iti panagbiag ken panagserbida ti pudno a kaipapanan ken espiritu ti Paskua – ti panagari ti ayat ken kappia a sagut ti Dios iti pannakaipasngay ti Mesia.

Manipud idi Hunio a nangrugi a nagakem ni Duterte ken dagiti nangabak idi eleksion ket awan-sarday dagiti nabara nga isyu ken kontrobersia iti gobierno. Manipud nagakem ti agdama nga administrasion ket dimmanonen iti 5,000 dagiti biktima ti pammapatay a mapapati nga adda pakainaiganna iti illegal drug trade bayat ti gerra ti gobierno kontra illegal a droga. Malaksid kadagiti napapatay kadagiti lehitimo a police operations, adu dagiti mapapati a biktima ti summary executions wenno extra judicial killings. Mairaman dagiti biktima ket dagiti suspek iti illegal drug trade, ken inosente a tattao.

Nabara ti pinniltak dagiti nangato nga opisial ti gobierno kas ti susik da Duterte ken Sen. Leila de Lima. Inakusaran ti Presidente ti kabarbaro a Senadora a protector ti illegal drug trade sadiay New Bilibid Prisons idi isuna pay laeng ti Justice Secretary. Immuna a tinubngar ni De Lima ti panagraira ti extra judicial killings ken human rights violation. Impalgak ni Duterte dagiti adu agpapaay iti gobierno a karaman iti narco list a pakairamanan dagiti pulis, opisial ti local a gobierno, kongresista, hues, piskal ken dadduma pay a nangato nga opisial. Mapadpadaanan pay ti baro a narco list nga iparuar ti Presidente.

Iti benneg ti kappia ken seguridad, naideklaran ti Alert Level 3 Status ti Philippine National Police gapu iti pangta ti terorismo. Agtultuloy met ti terorismo ken riribuk sadiay Mindanao babaen ti Maute Group ken Abu Sayyaf Group. Agtultuloy met latta dagiti krimen ken pammapatay nangruna dagiti adda pakainaiganna iti illegal a droga.

Iti Kongreso, mapadpadaanan a sakbay ti panagbakasion dagiti mammanday-linteg ti pannakayusuat dagiti debate iti pannakasukat ti agdama a Konstitusion para ti panagbaliw ti porma ti gobierno iti Federalism. Maikamkamakam met sakbay ti Christmas break iti Lehislatura ti pannakapagkaykaysa dagiti gakat para ti pannakaisubli ti Dusa a Patay tapno malapdan dagiti adu a krimen.

Pagpampannakkel dagiti Pilipino ti Pilipinas kas Kristiano a pagilian. Ipaspasindayag dagiti dadduma nga opisial ti gobierno ti panagbasada kadagiti mabigbig a pagadalan, ken kadagiti eskuela Katolika. Ngem apay a saanda a maibiag dagiti naisuro kadakuada?

Ita a Paskua, maisardeng koman dagiti adu a terorismo ken pammapatay tapno awan dagiti madangran ken maulila a pamilia ket mariknada ti ragsak ti panagrambak ti pannakaipasngay ni Apo Jesus. Mapukaw koman dagiti managimbubukod nga interes dagiti opisial ti gobierno. Maisardeng koman dagiti pinnadakes, kurapsion ken riribuk tapno magun-od ti espiritu ti Paskua. (Eden A. Alviar)