EDITORIAL: Fertilizer fund scam, panawenen a madusa dagiti naglabsing

Napapanawen ti pannakaipila ti kaso dagiti dati nga agtuturay ti Department of Agriculture tapno agtulneken daytoy ken madusa metten dagiti nanggamulo  iti ginasut a milion a pundo daytoy nga opisina a saan met a dagiti mannalon ti nagnaar no di laeng dagiti politiko ken kumplotda iti eleksion idi 2004.

Itay Hulio 4, wenno pito a tawen a di maipakni ti panagalingasaw ti anomalia, napilaan iti plunder iti Sandiganbayan dagiti mapapati nga arkitekto iti P728 milion a fertilizer fund scam a pakaibilangan da dati nga Agriculture Secretary Luis “Chito” Lorenzo, dati nga Undersecretary Jocelyn “Joc-Joc” Bolante, dati nga Agriculture Assistant Secretary Ibarra Poliquit ken pito a pribado a tattao..

Imbilin pay ti Ombudsman ti pannakaimbestiga ni dati a Presidente Gloria Macapagal-Arroyo iti posible a pannakikumplotna kadagiti nadakamat nga opisial ti DA.

Kinapudnona, idi las-ud ti pito a tawen, nagpakni pay ni Bolante iti Estados Unidos, naaresto sa naipupok ken naideportar ditoy pagilian. Nagkandidato pay idi napan nga eleksion nasional ngem saan a nakalusot.

Dakkel koma a pagimbagan dagiti mannalon no nagtungpal kadakuada dagiti benepisio a nakairantaan daytoy a pondo. Ngem anian ta nagtungpal laeng iti pagimbagan ti sumagmamano.

Ti makadakes, naigatang dagiti pondo kadagiti ekuipo a saan met a kasapulan wenno naituding a pakagastuan ti proyekto ken overpriced dagiti ganagan a nagatang iti maysa a gunglo  agsipud ta nababbaba nga adayo iti merkado.

Intandudo dagiti tattao ni Presidente Ninoy Aquino idi eleksion gapu iti platapormana a panangpugipog iti korapsion ken panagkunniber iti gobierno.

Iti biangmi, daytoy a plunder case ti agbalin a barometro no kabaelan ti agdama nga administrasion ti “mangtukkol iti duri” ti dakkel nga ikan a saan laeng dagiti pipitsugin a kunada iti Tagalog.

Ita ta naglusulosen ni dati nga Ombudsman Merceditas Gutierrez, posible nga agdur-as metten dagiti kaso a naipila maikontra kadagiti dadakkel nga ikan iti napalabas nga administrasion a pakaibilangan ti dati a Presidente.

Agingga iti awan ti madusa nga agtuturay a nagtakaw iti pondo ti gobierno, dildilatandanto laeng uray asino man nga agpanggep a mangirubbuat iti panagdalus kadagiti koridor ti turay.

Itan ti kasayaatan a gundaway a “panangpungo” kadagiti natured a kimmaut iti agamang ti gobierno.#