EDITORIAL: Fertilizer scam: apay nga ita laeng nga agkuti?

Itay nabiit, imbilin ti opisina ti Ombudsman nga idadauluan ni Merceditas Gutierrez ti pannakaisaklang ti plunder case maikontra kada dati a secretary ti Agriculture Luis “Cito” Lorenzo, dati a DA undersecretary Jocelyn “Jocjoc” Bolante, dati a DA assistant secretary ti Ibarra Poliquit ken innem pay a sabali nga opisial mainaig iti fertilizer scam.

Naisaklang pay iti malbersasion dagiti siam a DA regional directors ken sumagmamano a dati nga agilinlinteg iti Kamara.

Nagramut dagiti kaso iti nailatang a P728 milion a pondo para iti pannakagatang dagiti ganagan a maiwaras kadagiti mannalon ngem mapapati a naaramat para iti panagkampania ni dati a Pres. Arroyo a timmaray idi 2004 a para presidente.

Idi kanikanem a tawen, iti report manipud ti Ombudsman Field Investigation Office, inrekomendana ti pannakaisaklang da Lorenzo ken Bolante iti malbersasion iti public funds ken panagsalungasing iti Anti-Graft and Corrupt Practices Act wenno R.A. 3019.

Nangisayangkat met idi 2005 ti Blue Ribbon Committee nga indauluan idi ni Sen. Richard Gordon iti panagpalutpot mainaig iti fertilizer scam ket insubmitena ti report idi 2009.

Kalpasanna, naturogen ti complaint iti Ombudsman. Kuna dagiti kritiko ni Gutierrez a tinugawanna.

Idi dinutokan ni dati a Presidente Gloria Arroyo ni Gutierrez a mangidaulo iti Ombudsman, timpaw ti suspetsa a naipatugaw tapno adda mangsalaknib iti dati a pangulo kadagiti nakaisaklanganna a kaso mainaig dagiti anomalia bayat ti panagtakemna kas presidente.

Adda pamkuatan dagiti kritiko nga agsao iti kasta: kinaklasean ni Gutierrez ni dati a First Gentleman Miguel Arroyo ken nagpaay a presidential chief legal counsel ni dati a Pres. Gloria Arroyo.

Ti saan a panagkuti dagiti complaints iti Ombudsman maikontra ken ni Arroyo ken dagiti dadduma nga opisialna ti maysa a nakaibatayan ti impeachment complaint maikontra ken ni Gutierrez.

Ita, kalpasan ti nasurok lima a tawen a pannaturogna, nagkuti met laengen ti naipila a complaint mainaig iti fertilizer scam.

Ngem kinuna ti maysa nga opisial ti administrasion Aquino iti daytoy a kaudian nga addang ni Ombudsman Gutierrez: “Too little, too late,”.

Masirmata met a paset daytoy ti depensa ni Ombudsman Merceditas Gutierrez a pangipakita a dina sinaksaklot ti imana mainaig iti daytoy a kaso.

Ti saludsod: babaen daytoy nga addangna, maallukoy ngata ni Gutierrez dagiti senador a mamati a saanna a tinugawan ti complaint ti fertilizer scam a karaman iti impeachment complaint maikontra kenkuana?#