EDITORIAL: GOCC: Saanen a Pagbagasan

Iti panangiremit dagiti government-owned and ontrolled corporations (GOCCs) iti P27,898.47 billion a dibidendo iti national treasury idi napan a lawas, makuna a nagbalbaliwen ti reputasionda a kas agdudungsa no di man agintutuleng ken aginbubulsek a nakamulagat a korporasion. Iti ababa a pannao, saandan a pagbagasan dagiti garamugam, antukab ken atitiddog ti imana nga opisial ti gobierno ken maimpluensia a tattao. Makunan a nagbalbaliwen ti imahena ta nagbalindan a nabaknang a minasan ti pagilian. Iti uneg laeng ti tallo a tawen, nakairemitda iti P77 billion iti kaban ti gobierno.

Makuna a maiduma la unay ti payagpagda kadagiti napalpalabas nga administrasion ta nakalawlawag a dakkel ti sapulda ngem murkat laeng ti kabaelanda nga iremit iti gobierno.

Isu nga immapon iti muging dagiti umili a nagbalinda a pagkaudan dagiti bukatot iti kabukbukodanda nga interes. Dakkel la unay a pug-aw iti anges ti gobierno ti intedda a remittances iti napalabas a tawen, lalona iti daytoy a tawen,  a maiwaras a nalaing ken maiwardas kadagiti umili dagiti kangrunaan a basic services; ti panagbalbaliw ket mangipaay iti narangrang nga agsapa ken nakananama a panagdur-as dagiti amin nga umili.

Nupay makuna a dakkel la unay ti iyapagda, mamatikami nga inton umay a tawen ken kadagiti sumarsaruno a tawen ket ad-adu pay ti ipabussogda iti kaban ti ili. No apay a makunami daytoy, agsipud ta walwalo laeng kadagiti nasurok sangagasut a GOCCs ti nakaited iti P1 billion. Uray no kagudua laeng kadagitoy ti makairemit iti uray maysa a billion a gatad, makunan nga agpayso a narangrang ti Tuwid na Daan; saanen a masaksakit ken kuttongit a kuting no di ket nabun-as ken aktibo a tigre iti Asia, a kas  asessment dagiti agpalpaliiw iti ekonomia.

Nabayagen a kumarkaramut iti panaganges ti pagilian, ngem saan a ti kinakurapay ti mangidadanes kenkuana no di ti nalabes unay a kurapsion iti bakkubakkog a dana a taltaluntonenna. Nabaknang ti pagilian kadagiti natural resources ngem nagbalinda a pagbaknangan dagiti personas a nakabarong ngem agluyluyloy ti dakkel nga  akakda ken ti butirog a tian nga agrenrennek iti agkakaimas a taraon a linaon ti pinggan ngem siit laeng ti ipuruakda iti dakulap ni mabisbisinan unay a Juan.

Mangnamnamakami a daytoyen ti madlaw a gutad ken irteng ti panagbalbaliw. (JMA, Jr.)