EDITORIAL: Grace Poe: sabong a nagukrad iti umuna a tudo kalpasan ti kalgaw

Dakkel a nakasiddaawan dagiti agpalpaliiw iti politika ti panagbalin ni Grace Poe a topnotcher iti kalkalpas a panagpipili.

Ngamin, kadagiti immuna a rimmuar a resulta ti survey ti Pulse Asia ken ti Social Weather Stations, consistent ti nagan da Legarda, Escudero, ken ni Cayetano kadagiti adda iti umuna a tallo a puesto.

Kinapudnona, iti rimmuar  a resulta ti Pulse Asia Survey idi apagtapog iti daytoy a tawen, awan ni Poe iti Magic 12, adda ti naganna iti maika-13 agingga iti maika-16 a puesto, nangruna idi inibbatan ti UNA a kas guest candidate kalpasan nga imbilin ni Presidente Aquino iti saanda nga iyuuli iti stage a pangisayangkatan ti UNA iti panagkampaniada.

Ngem iti surbey ti Social Weather Stations a naiparuar idi Marso 2013, kimmalay-at ni Poe iti maikapat a puesto.

Kasta met nga iti surbey ti SWS idi Abril 20-22, ngimmato ni Poe manipud iti maikapat iti maikatlo a puesto. Nupay da latta Legarda, Escudero ken Cayetano dagiti adda iti umuna a tallo a kangatuan a puesto, napaliiw a bimmaba ti sumagmamano a porsiento ti suportada manipud kadagiti botante.

Di ngarud ninamnama ti ikakalay-at ni Poe iti umuna a puesto iti kalkalpas a senatorial elections.

Ania dagiti makagapu iti daytoy di ninamnama a panangtippuog ni Poe kada Legarda, Escudero ken Cayetano iti puestoda?

Ti apeliedo ni Poe ti nangruna a nangitag-ay kenkuana iti alimpatok ti ranking, segun iti maysa a political analyst. Maysa kano daytoy a bindikasion iti mapapati a pannakasuitik ni Fernando Poe, Jr. idi eleksion idi 2004 a panagbalubalda ken ni dati a Presidente Gloria Macapagal-Arroyo.

Sabali laeng ti panangsappuyot kenkuana dagiti adda iti show business ken iti panangiyinderso kenkuana ni dati a Presidente Erap Estrada sumagmamano nga aldaw sakbay ti eleksion. Saan a malibak nga adda pay la political clout ni Estrada kas ipaneknek ti panangilampasona ken ni Mayor Afredo Lim iti panagbalubalda iti kinamayor ti Manila.

Maikatlo, ti panangsappuyot kenkuana dagiti Muslim iti Kamindanaoan. Saan a palimed nga asideg iti puso daydi FPJ kadagiti Muslim ket mapapati a nangabak ti aktor sadiay ngem sabali ti nagbalin a resulta ti panagbubutos.

Ngem kangrunaan a nangiyasideg ken ni Grace Poe kadagiti umili ti imahena a kas kandidata a saan pay a napulapolan iti rugit ti politika. Nakita daytoy a saguday ken daydi nag-Presidente Cory Aquino nga agingga iti pannakatayna, ket rinaraem,  tinangtangad ken pagrukbaban dagiti umili.

Kayarigan ni Poe ti sabong a nagukrad iti umuna a tudo kalpasan ti kalgaw. Bareng no saanto a dadaelen ti politika.#