EDITORIAL: Gubat, nadamsak, di maikanatad

SAAN a maikanatad ti gubat. Saan a nainkalintegan. Kas iti gubat iti Middle East – iti Libya a nakaibuisanen dagiti ginasut a tattao. Umad-adu ti bilang dagiti biktima agsipud ta mapattapatta nga agpaut ti gubat. Rinibribun dagiti napadisi iti pagtaenganda. Nairamraman pay dagiti kailiantayo a kapilitan a naggawid agsipud iti panagpeggad ti biagda iti sanguanan dagiti nadara a panagririnnupak dagiti rebelde ken dagiti buyot ti turay.

Dakkel ti nabusbos ti turay iti pannakaibakuit dagitoy kakailiantayo. Ti nakaladladingit ditoy ket kaaduanna kadakuada ti awan a pulos ti naiyawidda. Nagsublida ditoy pagiliantayo a dakkel ti ngatngata iti masakbayanda.

Ditoy pagiliantayo, rimsua manen ti panagrinnupak ti buyot ti gobierno ken ti MILF.

Masaludsod: mano a biag ti naisakripisio gapu laeng iti panagpingki dagiti ideolohia? Mano a pamilia ti nadislugar gapu iti pannakaipatngada iti arena ti pagbabakalan? Mano ti dagup dagiti sanikua, pagtaengan, ken dingnguen ti nadadael ken natay?

Iti biang ti turay, nadagsen a baklayna dagiti nabusbos para kadagiti ramit ken armas a pakigubat dagiti soldado tapno masalakniban ti kappia. Ditayon iraman ditoy ti sugat a pinarnuay ti pannakapasag ti ipatpateg nga anak, ama wenno kabagian iti pagbabakalan, wenno ti iliw, amak ken ngatangata dagiti pamiliada nga agpampanunot iti kasasaadda iti pagbabakalan.

Kadagiti biktima ti gubat, saan a magatadan ti aliaw, kinadaksanggasat ken duadua iti nalidem a masakbayan nga agur-uray iti pamiliada.

Naundayen a panawen a nadagsen a problema ti gubat iti Mindanao. Agingga ita, problema pay laeng daytoy a di maikkan iti naan-anay a solusion.

Rinibribu a pamilia ti naapektaran ti gubat iti daytoy a deppaarna ti pagilian. Kas kadagiti umili a naipit iti nagbaetan ti panagrurupak dagitoy dua a puersa. Pinanawan a kapilitan dagitoy a pamilia ti pagtaengan, bangkag ken pagsapulanda ket naibalayda kadagiti evacuation centers.

Minilion metten ti nabusbos ti turay kas tulong dagiti nagbakuit a pamilia wenno residente. Naaramat ti pondo kadagiti relief supplies, makan, ken suporta nga administratibo iti operasion ti didigra.

Iti Mindanao laeng daytoy. Di pay nadakamat dagiti biktima iti panagrupak ti NPA ken ti turay.

Kas makita, dakkel a perhuisio ti ipaay ti gubat.

Adu ti ramaramenna.

Nadamsak ti gubat: Dagiti umili ti kangrunaan a biktima iti panagdinnangir dagiti ideolohia.

No di maikanatad ken nainkalintegan ti gubat, apay nga agtultuloy ti kinadamsak? Apay nga agdidinnangir dagiti Pilipino idinto a maymaysada a puli?#