EDITORIAL: Happy Anniversary, Tawid News Magasin

Ita a bulan, selebraran ti Tawid News Magasin ti maika-10 a panagtawenna. Wen, maysa a dekadan ti pagiwarnaktayo!

No taldiapan ti napalabas, kasla dimi patien a makapagdaliasat ti pagiwarnaktayo iti nabato ken nalubo a dalan ken madanonna ti agdama a kasasaadna. Saanmi a kunaen a dakkelen a warnakan ti Tawid News Magasin. Kinapudnona, bassit pay laeng a warnakan no maidilig kadagiti nadumaduma a pagiwarnak ditoy Ilokos ken kadagiti kabangibangna a probinsia. Ngem makunami nga iti unos ti sangapulo a tawen, dakkel metten ti nagbalin a paset ti Tawid News Magasin iti aginaldaw a panagbiag dagiti kakailian nga Ilokano ditoy Amianan ken uray iti ballasiw-taaw gapu ta makadanon metten kadakuada babaen ti kabukbukodanna a website: www.tawidnewsmag.com.

Rimmuar ti Tawid News Magasin gapu iti kapaliiwanmi nga agkurkurang dagiti pagiwarnak a pakaammuan dagiti kailian iti mapaspasamak saan laeng a ditoy Ilocos Sur no di pay iti kaparangetna a probprobinsia, kasta met agpaay a ridaw a pakaasaan iti pluma dagiti kailian a mannurat.

Kinapudnona, sakbay ti TNM, adda sumagmamano nga inruarmi a pagiwarnak, wenno nakibuliganmi nga inruar kas iti Baggak, Damag-Ilokos, Ilokandia Today, ken Saringit Chronicle. Nagpaut dagitoy iti iti makatawen wenno nasursurok pay, ngem in-inut a nagpukawda gapu iti pinansial a problema. Kapautan kadakuada ti Saringit Chronicle ngem inaplat daytoy gapu ta sinerrek ti intriga. Adda dagiti damagmi nga adda sagpaminsan a rimmuar a Saringit Chronicle ngem makunami a rurog daytoy iti orihinal a saanto a matukadan.

Idi rimmuar ti Tawid, adu dagiti ublag, aglalo manipud kadagiti kritiko a di mamati nga agsantak ti maysa a pagiwarnak nga awan ti umdas a pondona ken pamastrekanna iti makatawen. Ngem saantayo nga intaltalek dagitoy. Pinagbalintayo ketdi a maysa a karit iti kabaelantayo ken determinasion a maaddaan ti Kailokuan iti pagiwarnak a saanda nga ibain a basaen ken sappuyoten.

Kas nakunamin: nabato ken nalubon ti dalan. Adda dagiti panawen a seknankami ti panagduadua ken pannakaupay. Ngem pagyamanan ta adda dagiti kamannurat a di nagpaidam a nangipaay iti tulong ken suportada ken pammatida a makatakder nga agmaymaysa ti pagiwarnak. Dagitoy dagiti pudno a gayyem nga inkam ilalaen ken diminto malipatan.

Ita a pannakadanon ti maika-10 a panagkasangay ti Tawid News, ipasingkedmi ti ad-adda pay a panangigaedmi a mangted kadagiti kalugaranmi iti babasaen a saan laeng a mangitandudo iti kultura ken tagipatgen ni Ilokano no di pay dagiti sinurat a pagsarmingan iti pudpudno a kinatao ni Saluyot.!

Dios manen ti agngina!#