EDITORIAL: Hustisia kadagiti biktima ti Maguindanao massacre

Innem a tawenen ti Maguindanao massacre ngem agingga ita, awan pay uray maysa a nakonbiktaran nga akusado. Agur-uray pay la iti hustisia dagiti pamilia dagiti 58 a napapatay iti dayta a masaker a pakaibilangan dagiti 32 a kameng ti media.

Apay a kastoy ti kabayag ti kaso, nabumbuntog pay ti pannagnana ngem iti agin-iniin a pagong?

Iti las-ud ti innem a tawen, agdagupen iti 150 dagiti naipresentar a saksi, malaksid laeng a rinibribu a pahina ti naidatagen iti korte.

Maysa pay a pakataktakan dagiti kaso ti dawat dagiti akusado iti kaso a makapagpiansada. Agdagup iti 69 dagiti nangidatag iti bail plea iti korte ni Judge Solis-Reyes a pakairamanan dagiti dua a primary nga akusado iti masaker, da Zaldy Ampatuan ken Andal Ampatuan, Jr.

Agdagup iti 45 nga akusado, kaaduanna dagiti police officers ti pinalubosan ti korte a makapagpiansa idinto a 17 ti dina pinalubosan. Karaman ditoy ni Zaldy Ampatuan, maysa kadagiti kangrunaan nga akusado iti masaker.

Maysa pay laeng, ni Sajid Islam, anak ni Andal Sr. ti nakapagpiansa iti baet a P11.6 million ti naituding a pagpiansana para iti temporario a wayawayana. Ita, gundawayanna daytoy a pannakawayawayana ket kumandidato a para mayor. Iti dayta a kaadu ti kuartana, dakkel ti posibilidad a mangabak iti eleksion.

Ita, kayat met ti kampo ni Zaldy Ampatuan nga apelaen ti pannakaibasura ti dawatna a makapagpiansa.

Iti baet dagitoy, mangnamnama ti abogado dagiti biktima a maited ti hustisia kadagiti pamilia dagiti biktima sakbay nga agtapos ti panagtugaw ni Pres. Benigno Aquino III. Maipalagip nga impanamnama idi ni Aquino idi katugtugawna iti pannakaited iti hustisia kadagiti biktima iti Maguindanao massacre.

Uray ni dati a Sekretario iti Hustisia Leila de Lima, mangnamnama nga adda makonbiktar sakbay ti pannakaungpot ti termino ni Pres. Aquino.

Kasta met ti pammati ni Gov. Mangudadatu. Karaman ti asawana dagiti napapatay iti dayta a masaker.

Ngem no patien ti abogado dagiti akusado, lumbes iti termino ni Pres. Aquino ti pannakalpas ti kaso. Daytoy ti am-amken dagiti mangsursurot iti kaso. Amangan no inton sabali ti presidente, ket ad-addan a maipaliwaleng ti kaso agingga iti maikupin ken maipakni.

Iti biangmi, mamatikami a maited ti hustisia para kadagiti biktima ti Maguindanao massacre ngem anian ta aglasat ti kaso iti ingget kipet nga abut.#