EDITORIAL: Hustisia kadagiti comfort women, kaano a magun-odda?

Maysa a damag ti nakaawis iti imatangmi iti panagbisita ni Presidente Benigno Aquino III iti pagilian a Japan itay nabiit: innem a babbaket nga agtawenen iti otsenta ti nagmartsa iti Embahada ti Japan ket dinawatda ken ni Prime Minister Shinzo Abe ti panagpadispensarna ken panangitedna kadakuada iti kompensasion gapu iti sinagabada a pannakairurumen iti ima dagiti soldado a Hapon idi Maikadua a Gubat ti Sangalubongan.

Narigat nga awaten ti sibilisado a lubong nga uray agingga ita ket saan pay a nagun-od dagiti comfort women ti hustisia a linak-amda manipud kadagiti nadangkes a soldado a Hapon idi kangitingitan ti Maikadua a Gubat ti Lubong.

Nasurok pitupulo ket maysa a tawen ti napalabas, bimtak ti Maikadua Gubat ti Lubong idi rinaut ti Imperio ti Japan ti Pearl Harbor a nangtukkolanna iti puersa ti nabal ti Estados Unidos sadiay Hawaii. Daytoy ti mitsa a nangpatapog iti Estados Unidos iti gubat.

Iti panangsakup dagiti Hapon kadagiti pagilian iti Asia, maysa ti Pilipinas kadagiti kangrunaan a nagsagaba, ket maibilang ditoy dagiti agtutubo a babbai a pinorsar dagiti opisial a Hapones nga agtrabaho kadagiti nadumaduma a kampo ken nagbalin payen a pagpapausan dagiti derrep a soldado iti rabii.

Kayarigan dagitoy ti apagbukar a sabong iti kapanagan a kasla abalbalay a nagsisinnublatan a linunes dagiti soldado kadagiti derrep a rabii.

Idi 1993, nagpadispensar ti turay ti  Hapon kadagiti Asiano a comfort women gapu iti pannakaporsar dagitoy a nagbalin a para ep-ep iti derrep dagiti soldado ti Imperio ti Hapon.

Ngem agpatingga latta kadi ditan? Iti nasurok pito a dekada, nagtultuloy ti saan a pannakaitaltalek ti arungaing dagiti comfort women a maikkanda koma iti hustisia iti kinaranggas a nalak-amda iti ima dagiti soldado a Hapones. Adun kadakuada ti pimmusay a dida man la nalak-am ti uray kabassitan a gin-awa kas supapak iti naglasatanda a pannakairurumen, pannakalalais ken pannakadurmen gapu iti saanda a nagay-ayatan a panagbalinda a liwliwa dagiti derrep a Hapones.

Bassit laeng a banag ti demanda dagiti agkurkuribetbeten a babbaket ken ni Prime Minister Shinzo Abe: padispensar ken bassit a kantidad gapu kadagiti sinagabada.

Saan la kadin a maited daytoy ni Abe ita ta sibibiag pay dagitoy uray tallikudandan ti langit iti kinabaketda?

Kasta met ken ni Presidente Noynoy Aquino, apay nga awan ti nabatad a pagtaktakderanna mainaig kadagiti kailianna a napilit a nagbalin a comfort women dagiti Singkit?

Panawen koman a nagtimek  ni Presidente Noynoy idi makitana ti panagprotesta dagitoy a babbaket iti ibibisitana iti Japan itay nabiit. Sayang laeng ta idinto a gundawayna koma a mangipakita iti kinapateg ti dayaw dagiti kailianna a babbai, nagulimek lattan tapno saan a mapasugkian ti rikna ti opisial a mangsangaili kenkuana.

Napalusposan ni Pres. Noynoy Aquino ti gundaway a mangipakita iti garit ti pudpudno a mangidaulo: dadaulo nga addaan iti dakkel a respeto kadagiti babbai ken galad a mangitakder iti rupak dagiti naidadanes a kailianna a comfort women.#