EDITORIAL: Ibutostayo ti Vigan City a maysa a 7NewWonders Cities

No pudpudnoka nga Ilokano ken maysa a Filipino, dika agpangadua a mangibutos iti Vigan City a maysa kadagiti 7NewWonders Cities iti intero a lubong.

Adda dagiti naipangruna a rason no apay nga intayo itandudo ti Vigan City iti daytoy a kampaniana tapno maibilang a maysa kadagiti 7NewWonders Cities:

Ditoy laeng Vigan ti pakasarakan kadagiti duog a bato a pagtaengan a naipatakder pay laeng idi tiempo dagiti Kastila nga agingga ita ket inkagumaan ti gobierno ti siudad iti panangidaulo dagiti agtuturaytayo ken dagiti mangisaksakit a Bigueño a prineserba, sinalakniban ken napagtalinaed iti dati ken orihinal a kitada. Babaen ti panagkikinnamayet dagiti amin a sektor ken dagiti umili a mangisaksakit iti daytoy siudad, naglupos daytoy a lugar a maibilang a maikatlo a kadaanan nga Spanish settlement iti intero a pagilian manipud iti nababa a klase nga ili agingga iti narang-ayen a siudad a maibilangen a maysa kadagiti kangrunaan a destinasion dagiti turista iti Amianan a Luzon.

Adda ngamin gupit ken saguday daytoy a lugar a saan a mabirokan iti sabali a lugar ken uray kadagiti dadakkel ken naprogreso a pagilian iti intero a lubong. Adda kabukbukodanna a kayaw, a mangigiddiat kenkuana iti sabali a lugar. No Siudad ti Vigan, kunam, mariknam ti pannakaipalaismo iti panawen a simple pay laeng ti panagbiag dagiti umili, a ti kalesa wenno kalesin ti kangrunaan a lugan dagiti tattao, iti panawen a panagimaro pay laeng ti kangrunaan a transaksion iti negosio iti nagbabaetan dagiti Intsik ken dagiti agnaed.

Ti laengen Vigan City ti nabatbati iti daytoy a pannakibalubalna kadagiti dadakkel a pagilian iti Lumaud ken iti Europa tapno mairaman a maysa kadagiti 7NewWonders Cities. Nupay nagtayaktak ti Cebu ken Iloilo idi damdamo, in-inut a naiwalinda iti dalan gapu iti puersa dagitoy nabileg a kabalubalda. Kayarigan ti Vigan City ti David iti Biblia a makirupak kadagiti higante a pagilian. Ngem babaen ti bileg dagiti butostayo, dakkel ti posibilidad nga ibalat ti siudadtayo ida, kas iti panangparukma ni David ken ni Goliath babaen laeng iti pallatibong. Kayarigan ti Vigan City ti sangkaballing a tapok, ngem kastay kunadan, kabaelanna ti mangpuling iti ikakalay-atna iti tapaw ti balligi.

Dakkel a karit kadatayo daytoy a kampania ti Vigan City a maibilang a maysa kadagiti pito a Wonder Cities iti baet dagiti nagkaadu a kalamidad a nangiluges iti pagiliantayo ken nangburak kadagiti adu nga arapaap, tarigagay ken tagainep. Ngem sabsabali ni Filipino, adda determinasiontayo, adda panagmaymaysatayo, adda panagsisinnaranaytayo, adda panagkikinnamayettayo a mangibayog iti bukodtayo a siudad iti tapno mabigbig daytoy iti intero a lubong.

Wen, agpinsantayo ngarud nga agbutos ta sika, siak, datayo amin ket maymaysa ti panggeptayo, ti arapaaptayo – ti pannakaibilangna a maysa kadagiti 7NewWonders Cities in the World.!