EDITORIAL: Ibutostayo ti Vigan iti New7WondersCities of the World

Bayat nga isursuratmi daytoy, makalawas laengen santo maiwaragawag dagiti nabutosan iti New7Wonders Cities of the World. Intay ngarud agpinsan a mangibutos iti Vigan a maibilang a maysa kadagiti pito a baro a pagsidsiddaawan a siudad iti sangalubongan.

Saantayon a dakamaten ditoy dagiti pagimbagan a sagrapen ti Vigan no mabutosan a maysa iti New7WondersCities of the World. Nakitatayon ti progreso a sagsagrapen itan ti Palawan kalpasan a nabutosan a maysa iti New7Wonders Nature pf tje World. Naikitikiten ti naganna iti mapa ti sangalubongan ket daydaywen itan dagiti rinibu a turista tapno umayda dayawen ti pagsidsiddaawan a kinapintas ti nakaparsuaan iti dayta a paset ti pagiliantayo.

Kas umili iti pagilian a Pilipinas, agmaymaysatayo koma a mangibayog iti daytoy a kampania ti Vigan City a mabutosan iti New7Wonders Cities of the World. Iti daytoy a kampania, ti Vigan ti kakaisunan a nabati a siudad a mangitagtag-ay iti pagiliantayo, kayariganna ti maysa a naganus a David a makidindinnaer kadagiti mala-Goliat a siudad iti nadumaduma a paset iti lubong tapno masibbolna ti pammadayaw kas maysa kadagiti pito a baro a pagsidsiddaawan a siudad iti Lubong.

Addan ti ngalay ti dalan ti kampania no sadino a nabaelan ti Vigan a dinalupo dagiti dadakkel a siudad iti baet ti kinanumona, iti sanguanan ti nakisang a pondona. Iti daytoy a bakal, naipamatmatnan nga uray iti kinabassitna ket addaan iti tibker ken determinasion nga umaddang agingga iti tapaw ti balligi babaen ti panagmaymaysa ken panagtitipkel dagiti Pilipino.

Intayo ngarud agpinsan nga agbutos iti daytoy maudi a rikus ti kampania, pagbalinentayo nga aglaplapusanan ti suportatayo iti Vigan, agsipud ta aniaman a balligi ti siudad iti daytoy a kampaniana, balligitayo amin, maidayawtayo amin.

Agbutostayo amin agsipud ta maymaysa a puli ti nagtaudantayo, puli ni Pilipino, puli a maipagtangsit ken mararaem. Saanen a kampania laeng ti Vigan daytoy no di kampaniatayo amin.

Kakailian, ti butosmo ket butos saan laeng a para kadatayo iti agdama a panawen no di pay para iti naranraniag a masakbayan ti sumaruno a henerasion!