EDITORIAL: Illegal recruitment, apay a di mapugipog?

Kaadduanna kadagiti Overseas Filipino Workers a naggawid manipud iti Syria a kinakuyog ni Vice Pres. Jejomar Binay ket biktima iti human trafficking.

Iti interbio nga insayangkat ti Inter-Agency Council Against Trafficking (IACAT), limtuad a 31 manipud iti 37 nga OFWs a naggawid manipud iti nasao a pagilian ti biktima iti human trafficking. Ti nakarkaro pay, 23 iti bilang dagitoy nga OFW ti saan laeng a biktima ti human trafficking, illegal pay a narekrutda, ken 25 ti biktima iti illegal recruitment.

Daydiay kakaisuna a lalaki a taga-Pangasinan ken kalakayan iti grupo a nairaman a naggawid ket biktima ti illegal recruitment ken human trafficking.

Kinapudnona, saanen a baro a damag ti human trafficking ken illegal recruitment kadagiti kakailiantayo. Uray kadagiti naglabas a tawen, adun dagiti naireport a kakailiantayo a nagbalin a biktima iti human trafficking ken illegal recruitment iti baet ti kaadda dagiti linteg a kas iti RA 8042 wenno ti Migrant Workers and Overseas Filipino Act of 1995 ken iti RA 9208 wenno tiAnti-Trafficking in Persons Act of 2003.

Idi nagbalin dagitoy a linteg, adu ti nangnamnama a babaen kadagitoy, maruburob kadagiti kakailiantayo, nangruna dagiti rekruter nga agipatpatulod kadagiti kadaraantayo a mapan agtrabaho iti ganggannaet a pagilian.

Ngem kapaliiwan ketdi a kasla awan ti ngipen dagitoy a linteg a mangsalaknib koma kadagiti kakailiantayo manipud kadagiti illegal recruiters ken human traffickers agsipud ta agtultuloy met latta dagitoy iti rinuker nga aramidda.

Kas aksionna, imbilin ni Bise Presidente iti mandatory a pannakainterbio amin dagiti agsubli nga OFWs uray ania a pagilian ti naggapuanda kalpasan ti pannakaduktal a karaman ti maysa a menor de edad iti grupo dagiti OFWs a naggawid manipud iti Syria.

Naduktalan pay bayat iti interbio kadagiti OFWs nga uppat kadagitoy ti menor de edad pay laeng idi napanda nagtrabaho iti Syria, kasta met a lima kadagiti OFWs ti nagaramat iti sabali nga identidad iti passportda.

Imbilin pay ni Binay iti IACAT iti panangtuntonna kadagiti ahensia a nangrekrut kadagiti kailiantayo a napan nagtrabaho iti Syria tapno maputed dagitoy nga illegal nga aramidda.

Saan laeng nga agpatingga iti pammilin ni Bise Presidente Binay. Surotenna koma ti pannakapalutpot dagitoy nga ahensia a nangbiktima kadagiti kakailiantayo tapno maisaklanganda iti kaso ken maipalladawda iti pagbaludan. Kasapulan a mangsampolda tapno daytoy ti agbalin a pagmennamennaan dagiti illegal recruiters ken human traffickers.

Agingga iti agpatingga laeng iti pammilin ken awan met ti madusa wenno maikursong iti pagbaludan, agtultuloyto latta dagitoy nga ahensia, ken babaen ti pannakikumplot dagiti buklis nga agtuturay, a mangbiktima kadagiti kakailiantayo a kangrunaan a panggepda iti ipapanawda ditoy pagilian tapno makateggedda iti nawadwadwad para iti masakbayan dagiti annakda ken pamiliada,  ngem anian ta maikursongda iti pagtrabahuan a kasla tagaboda ken iti babaen dagiti di makatao a situasion gapu laeng iti pananggundaway kadakuada dagiti sumagmamano a buklis a kadaraanda a kayariganda iti alimatek a mangsepsep iti dara ken pigsada.#