EDITORIAL : Impeachment ni CJ Corona, rupak ti teknikalidad

Kalpasan ti pannakaipila ti impeachment complaint maikontra ken ni Supreme Court Chief Renato Corona, sagsaganaanen dagiti umili ti panagpingki dagiti argumento ti dua a bunggoy dagiti abogado: iti maysa a bangir ti prosekusion a mangpaneknek a

naglabsing ti chief justice kadagiti akusasion a naidatag maikontra kenkuana ken iti sabali a bangir, ti bunggoy dagiti abogado a mangsalaknib ken ni Corona tapno maibasura ken malusotanna ti impeachment complaint.

Walo ti naipalaon iti articles of impeachment a mapapati a linabsing ni Corona kas iti culpable violation of the Constitution, betrayal of public trust ken graft and corruption.

Tatta pay laeng a kabuangbuangay dagiti mangbukel iti prosekusion ken iti depensa, nangrugin ti psywar mainaig iti impeachment complaint.

Pinaglibakan ni Corona ((babaen dagiti abogadona) dagiti alegasion maikontra kenkuana a naipalaon iti impeachment complaint ket kiniddawna nga ibasura a dagus ti Senado daytoy agsipud ta awan ti basena, ken naidardaras ken saan a naberipika dagiti petisioner kas intuding ti konstitusion.

Kinuna pay ti maysa nga abogado ni Corona a nakapsut dagiti alegasion a naipalaon iti impeachment complaint nga indatag dagiti agilinlinteg iti Senado.

Ngem iti biang dagiti prosekutor, ingget kapsut met ti sungbat ni Corona.

Maysa pay a prosekutor ti nangkarit ken ni Corona a sungbatanna dagiti alegasion maikontra kenkuana a di ket ti panangkuestionarna iti teknikalidad ti impeachment complaint.

Indillaw pay ti maysa nga agilinlinteg a depektibo ti sungbat ni Corona iti impeachment complaint maikontra kenkuana agsipud ta saanna a pinirmaan.

No kastoy ti wagas a panagrupak ti agsumbangir a partido a kuestionaranda uray kabassitan nga abut ti legalidad dagiti alegasion ken kontra alegasion, ad-adda laeng a maulaw ken mabingay dagiti tattao ket posible a maisaang manen ti pagilian iti napudot a dalikan ti kinatalingenngen ti kasasaad ti politika ditoy pagilian.

Sapay koma ta saan nga agpaut ti pannakadengngeg iti impeachment complaint iti Senado. Kaasi ti pagilian no daytoyto manen ti sentro nga isyo a sanguen dagiti agilinlintegtayo ket maipasuli manen dagiti programa ken gannuat ti ekonomia ti pagiliantayo.#