Footer

EDITORIAL: Impeachment ni Gutierrez, panawenen nga aggunay

Iti panangipalubos ti Supreme Court a maituloyen ti panaguyas ti impeachment complaint maikontra ken ni Ombudsman Merceditas Gutierrez, ditoy ti pakakitaan no adda political will ti Kamara a mangiwayat iti pannakaikkat daytoy nga opisial iti puestona. Kasta met a makita no adda pay la masnop a puersa ni dati a Presidente Gloria Macapagal Arroyo a mangsalaknib iti daytoy asideg kenkuana nga opisial a kapaliiwan a dakkel a tubeng iti panagannayas dagiti naipila a kaso a mapapati a nakaisawsawan ti dati a presidente, ti asawana ken dagiti dadduma pay a nangangato nga opisial ti turay a pakaibilangan ti fertilizer scam, North Rail, ti broadband deal ken panagsuitik iti eleksion idi 2004.

Naipila pay laeng dagitoy a kaso idi kabayatan ti kaadda iti puesto ni Pres. Arroyo ket saanda a dimmur-as iti baet a dagitoy dagiti nanggungon iti administrasionna ken namagsuek iti panagtalek dagiti umili ken ni GMA.

Nupay sangkapetteng ni Gutierrez nga ar-aramidenna ti amin a kabaelanna para iti nadaras a pannakarisut dagiti complaint a naidatag iti opisinana, paneknekan ti rekord a kasla pag-ong ti kaginad ti panaguyas dagiti kaso a mapapati a nakainbolbaran ti dati a Presidente ken ti asawana, agraman dagiti nangato nga opisial iti babaen ti administrasionna.

Kabayatan ti kaadda iti puesto ni GMA, saan a pulos a nagdur-as dagiti impeachment complaint maikontra kenkuana a naipila iti Kamara agsipud ta saan a maparuar ti oposision ti bilang dagiti kongresista a mang-endorso iti daytoy a maipan iti Senado a naituding a pakausigan ti impeachment complaint.

Sagudayen ngamin ti Konstitusion a masapul a 2/3 votes iti kadagupan a bilang dagiti agilinlinteg iti kamara tapno aguyas ti complaint.

Ngem saan a malibak a kaaliado ni GMA ti majority dagiti kongresista agsipud ngarud ta isu ti dadaulo ti ruling party ket madadaan dagitoy a manglablab iti dakulap ti presidente iti maysa laeng a seniasna. Uray iti baet ti panawagan ti oposision nga agbutos dagiti adda iti majority babaen ti konsensiada, nagtalinaed ti loyalidad dagiti adda iti partido administrasion iti presidente ket nagtalinaed iti likudan daytoy aglalo ket adda dagiti “parabor” a mapapati nga intanggaya ti nalukay a dakulap ti puntiria ti impeachment complaint.

Iti panagsukat ti administrasion, nakerrasan ti puersa ni GMA. Ngem saan a malibak nga adda pay la dagiti kaaliadona a madadaan a mangsalaknib kenkuana. Kasta met a naipuestona dagiti matalekna kadagiti nadumaduma nga ahensia ti turay kas iti Ombudsman nga idauluan ni Gutierrez, iti kapolisan, ken iti korte a pakairamanan dagiti hues.

Agbalin ngarud ti complaint maikontra ken ni Gutierrez a napateg a barometro no adda tiansa dagiti impeachment complaint maikontra kadagiti nangangato nga opisial ti gobierno a nanggundaway ti puestoda.

Addan go-signal ti Supreme Court a maituloy ti impeachment complaint kontra ken Gutierrez.

Siputantayo daytoy no adda magudilan dagiti agilinlinteg a mangdupir iti puersa nga adda iti likudan ni Gutierrez.#