Footer

EDITORIAL: Inaldaw a Trabaho

Addan sumagmamano a komentarista ditoy rehion uno ti biktima ti kinadamsak. Dakamatentayo ti pannakapapatay ti maysa a broadcaster iti Ilocos Norte. Mapapati a gapu iti panangkritikarna iti maysa nga agtuturay ti puon ti nakapapatayanna. Agingga ita, awan pay ti naglawagan ti nasao a pammapatay.

Kasta met laeng kadagiti sabali a paset ti pagilian. Napapatay dagiti broadcaster ken agiwarwarnak gapu kadagiti rakurak ken panangibulgarda kadagiti dakes nga aramid ti sumagmamano nga agtuturay.

Kadagiti dadduma a pammapatay, mismo payen a ti Presidente ti nangibilin iti pannakaimbestigada tapno maisaklang dagiti nangisayangkat iti krimen.

Dagita a pasamak ti mangipaneknek a ni agiwarwarnak wenno komentarista/broadcaster, karkarawaenna ti tengngedna iti panangannongna iti pagrebbenganna.

Ta saan a malibak nga iti panagkomentario iti man radio, telebision wenno warnakan, adda dagiti mabaddekan ti tanganda.

Mabalin a nasakit unay ti sugat a gapuanan ti pannakaibulgar ti maikurkurimed nga aramid ti maysa nga agtuturay wenno  nabileg a tao ket posible a mangipakat iti pamuspusan tapno mabusalan iti agnanayon ti ngiwat ti broadcaster wenno commentator wenno pluma ti agiwarwarnak. Saan a maikkat dayta a suspetsa tunggal adda mapapatay a kameng ti media, iti man broadcast wenno iti print.

Yan ti rigat kadagitoy nga agtuturay wenno nabileg a tao, uray agdadata ti kinapudno dagiti kritisismo wenno alegasion maikontra kadakuada, pagbalinenda a personal dagiti isyo a pakairubuan ti biag dagiti kameng ti media.

Ditoy probinsia, dakdakkel ti peggad a sanguen ti maysa nga agiwarwarnak wenno komentarista ngem kadagiti kabaddungalanda iti siudad ken dadakkel nga ili.

Apay? Ditoy ngamin, ad-adda a napudot ti panagul-ulo dagiti paspasurot ngem dagiti dadauloda. Paneknekan dayta dagiti napasamak kadagiti napalabas a panagpipili.

No adda isyo a rummuar maikontra iti maysa a lider, kaadduanna nga awatenna ti isyo iti nalamiis a wagas agsipud ta maawatanna ti trabaho ti agiwarwarnak wenno komentarista.

Banag a mabalin a di maawat ti paspasurot ket isun ti mangaramid iti saan a rumbeng tapno ikaluyana ti amona ket mapasamak ti saan koma a mapasamak.

Napeggad a propesion ti media. Adda latta peggad a sangsanguen dagiti kameng ti media iti panangannongda iti pagrebbenganda. Kasla espada a nakabitin iti tuktokna nga iti bassit laeng a pannakakutina, mabalin nga agtinnag a mangkettel iti biag ti maysa a kameng ti media.

Ngem trabaho dagiti kameng ti media ti mangirakurak iti kinapudno. No adda malittikan, ania ngarud. Kas kunada: trabaho lang, walang personalan.

Saluduanmi dagiti kameng ti media a naipatli iti kasipngetan tapno laeng maibulgar dagiti maikurkurimed nga aramid dagiti agtuturay ken nabibileg a tattao a gamrud, managimbubukod,  a saan a rumbeng nga agbiag iti sidong ti disente ken makadios a kagimongan.#