EDITORIAL: Ingget daeg a kasar iti baet kinarigat ti panagbiag

Maibilang a kapategan a royal wedding ti panagkasar da Prince William of Wales ken Catherine “Kate” Middleton a naangay iti Westminster Abbey itay Abril 29. Nagbalin daytoy a kangrunaan a linaon dagiti damag kadagiti pagiwarnak, iti telebision ken radio iti sangalubongan, manipud iti engagement ring, dagiti dekorasion, maidasar a sagana,  tattao a naawis iti kasar, kawes ti agkasar ken  uray ti pagnaedanda kalpasan ti kasar.

Daytoy a kasar ti nagbalin a sentro dagiti pagpapatangan iti man kankanto ken/wenno kadagiti pasken iti nangato a gimong a nangted iti nadumaduma a reaksion, karirikna ken kapanunotan.

Iti kaaldawan ti kasar, nagpiesta ti sibubukel a Britania ket naisayangkat dagiti pasken, parambak, ken dadduma pay a pagraragsakan kas panangselebrar dagiti agindeg iti panagkallaysa ti prinsipe a maikadua iti linia iti trono ni Reyna Elizabeth.

Mapattapatta a dakkel a pirak ti nabusbos ti royal family a pakaibilangan ti reyna, kasta met kadagiti Middleton iti kallaysa. Nupay saanda a kayat nga ibaga no mano ti nagastoda, iti dayta a kinadaeg ti kallaysa, minilion la ketdi ti binurborda tapno awan pamilawan dagiti bisitada.

No patien dagiti ekonomista, dakkel ti pukaw iti ekonomia ti Britania iti daytoy a kadaegan a pasken ti pagilian.

Adda pamkuatanda nga agsao iti kasta agsipud ta arig nagsardeng ti panaguyas ti trabaho iti sumagmamano a lawas bayat ti panagsagana dagiti agtuturayda sakbay ken  kaaldawan, ken uray kalpasan ti kasar, nangruna iti pakaseknan ti urnos ken talna gapu iti isasangbay dagiti rinibribu a sangaili ken turista.

Pattapattaen dagiti ekonomista a nagpukaw ti ekonomia iti umabot iti $50 bilion gapu laeng iti panaginayad ti produksion gapu iti nasao a kasar.

Nupay makuna a positibo ti impact ti kallaysa iti ekonomia gapu kadagiti turista a nagdadarison a napan iti Britania tapno makipagrambakda iti nasao a pagteng ket napunpunno dagiti otel ken dadduma pay a pagkaseraan kadagiti bisita, kasta met kadagiti pakalaglagipan ken souvenirs a ginatangda, mapattapatta laeng nga umabot ti napastrekda iti aganay P2 bilion.

Naangay ti kallaysa idinto a saan a nasayaat ti ekonomia ti Britania gapu iti pinansial a krisis iti sangalubongan maigapu iti isusuyop ti presio ti lana iti world market ken iti idadakkel ti depisit ti budget ti Britania a kangrunaan ita a problema dagiti agtuturay daytoy a pagilian.

Ngem iti baet dagitoy, kaaduan pay laeng kadagiti agindeg ti agdirdir-i ken maragsakan iti pannakaimatangda iti kadaegan a pasken iti pagilianda sipud idi nagkasar ni Prince Charles ken daydi nagawan a Princess Di. Kasta karabaw ti raragsakan dagiti taga-Britania.#