: EDITORIAL: Intay Amin Makipagrambak iti Vigan City! | Tawid News Magazine - Weekly Ilocos News 📰

EDITORIAL: Intay Amin Makipagrambak iti Vigan City!

Iyawismi nga intay amin makipagrambak iti Siudad ti Vigan iti daytoy panangselebrarna iti Viva Vigan Binatbatan Festival of the Arts mangrugi inton Mayo 1. Wen, kakailian, intay amin makipagragsak iti makalawas a pannakaselebrar iti Binatbatan Festival, makilinnetlettayo iti igid ti kalsada tapno intayo agbuya iti Binatbatan Streetdancing Competition, makipaglung-aytayo kadagiti ingget lap-it ti siketda a mannala iti panangkumpasda iti naparagsit a tokar ken banugbog ti drum bayat iti umuna a paset ti kumpetision ken makipagriaw kadakuada iti showdown iti karabianna.

Makalawas a panagraragsak! Makalawas a panagtitipon a mangigis dagiti isem ken tumayok iti tangatang ti sarangsang dagiti katawa!

Ta napnuan kaipapanan daytoy a panagrambak!

Ta karagpin ti ragragsak ken selebrasion ti pannakaikabil ti Siudad ti Vigan iti nangatngato a pedestal iti imatang ti sangalubongan, kas New7Wonders City of the World!

Wen, kalpasan ti sangapulo ket lima a tawen manipud idi nailista a UNESCO World Heritage Site idi 1999, adtoy manen ti sabali a pammadayaw a nagun-od ti Siudad.

Dakkel a pakaidayawan tunggal Bigueno ti pannakaited iti siudadtayo daytoy a pammadayaw. Dakkel ngarud a makagapu no apay nga intayo amin agrambak.

Kunatayo ngarud: Viva Vigan – ti New7Wonder City of the World!#