Footer

EDITORIAL: Integridad, kredibilidad ti kasapulan iti Comelec

Sursuroten latta ti kontrobersia ni Pres. Gloria Macapagal-Arroyo. Itay nabiit, dua a “di am-ammo” a tattao ti pinilina a kabarbaro a komisioner ti Commision on Elections, da dati a Court of Appeals Justice Lucenito Tagle ken ni retired Malabon Regional Trial Court Judge Leonardo Leonida.

Mabalin nga awan koma ti mangeg a di umayon a reaksion manipud kadagiti dadduma a sektor kas iti Parish Pastoral Council for Responsible Voting (PPCRV), ti National Citizens Movement for Free Elections (Namfrel), militante a grupo ken agraman ti oposision no naggapu dagitoy dua iti bassit a listaan dagiti nominado a mangsukat kadagiti nagretiro a komisioner ti Comelec, da Florentino Tuazon ken Resurreccion Borja. Adda pay maysa a bakante, ti puesto di pimmusay a Commissioner Romeo Brawner.

Madakamat ditoy a nangbuangay ti Palasio iti search committee a binukel ti search panel ti Malakaniang, ti PPCRV ken (Namfrel).

Ngem iti saan nga ammo a rason, saan a nasurot ti listaan nga inrekomendada a pagpilian ni  Pres. Arroyo iti baro a komisioner.

Rumbeng nga ilawlawag ti Presidente no apay nga isuda ti napili idinto nga awanda iti listaan ti search committee.

Pidutentayo dagiti balikas ni PPCRV Chair Henrietta Villa: “… Naggapuanda? Nanginominar kadakuada? Ania a proseso ti naaramat?”

Kas ita, dagus a maipasungalngal dagitoy dua iti eleksion iti Autonomous Region in Muslim Mindanao (ARMM) inton Agosto 11. Pagaammotayo a tunggal eleksion, ditoy a rehion ti nakapaspasamakan dagiti panagsuitik iti eleksion a dakkel a nangapekto ken nangbaliw iti pudpudno a resulta ti panagpipili. Baptism of fire a kunada ket manamnama kadi a kabaelan dagitoy dua ti nadagsen a pagrebbengan a maipabaklay kadakuada?

Saantayo a mababalaw da Pimentel ken de Villa iti saanda a yaanamong kadagiti pili ni Pres. Arroyo. Kasapulan ti Comelec dagiti matalek, makabael ken awan ti pakapilawanda a komisioner agsipud iti kinababa ti kredibilidad daytoy nga ahensia a mangimatmaton iti panagpipili gapu kadagiti alegasion ti panagsuitik iti eleksion idi 2004 ken 2007.

Agpayso, aniaman ti namkuatan ti Presidente a nangpili kadagitoy dua, prerogatibona daytoy ngem iti inaramidna, mayarig dagiti dua a limsot iti butaw nga abut ti sagatan ti binuangay ti opisinana a search committee.

Inkalintegan ti maysa kadagiti napili a komisioner a “mapan iti komision a tugotna ti integridad ken kredibilidad,” ket ikkantayo ida iti naan-anay a gundaway a mangipamatmat iti senseridad ken kinataknengda a mangibaklay iti pagrebbenganda.

Makunatayo laengen: sapay koma… sapay koma… satayo ikararag nga adda tangkenda a mangiwayat iti nadalus ken natalna nga eleksion iti Mindanao a damo a pakaipakuanda a saanda ketdi a sangkataldiapda ti dakulap ti nangipan kadakuada iti puestoda.#