EDITORIAL : Isakbit koman ni Pacquiao ti glabna

Sakbay ti panagboksing da Manny Pacquiao ken ni Juan Manuel Marquez iti MGM Hotel, Las Vegas, liamado unay  ti Filipino boxing icon nga abakenna ti naud-udi. Kasta katalek dagiti mannugal a mangabak ni Pacquiao. Uray ni Freddie Roach, impadtona a paturogen ni Pacquiao ni Marquez iti maikanem a round. Kasta met ti padto ni Gov. Chavit Singson bayat ti interbio kenkuana ti media nakurang a dua a lawas sakbay ti panagsango dagiti dua iti ring.

Ngamin, iti immuna a panaglabanda idi 2004, na-knock down ni Marquez iti namitlo iti first round.  Idi maikadua a panagrupakda iti ring idi 2008, nadaleb ni Marquez iti maikatlo a round, ngem nabaelanna ti timmakder a nakirinnangas agingga iti maudi a rikos a nagtungpal iti split decision.   Ngarud, iti daytoy maikatlo a panagsangoda, kinuna ti trainer ni Pacquiao nga awan a pulos ti pannakaabak ti Filipino boxer, ket paturogenna pay ti Mehikano.

Ngem saan a kumbinsido ti panangabak ni Pacquiao ken ni Marquez iti daytoy maikatlo a beses a panagboksingda. Kinapudnona, risiris unay ket awan ti makaammo iti resulta agingga iti maudi a round.

Limtuad a pinaboran dagiti dua a judge ni Pacquiao iti maudi a rikos. Kasta karisiris daytoy a panagboksingda.

Kinapudnona, adu a nagbuya ti saan a napnek iti resulta ti boksing ket nagipalladawda kadagiti botelia, nanganan ken dadduma pay iti ring a nakataktakan bassit ti pannakainterbio ti Filipino champion.

Iti daytoy saan a nalawag a resulta iti maikatlo nga engkuentroda, posible a mapasamak ti maikapat a panagsangoda iti ring. Sigurado a rinibribu ti agbuyanto manen, aglalo kadagiti mamati a nangabak ti Mehikano.

Ngem masaludsod, ayannan daydi siglat ni Pacquiao a nangdalupo kadagiti nalalaing a boksingero, agraman dagiti adayo a nataytayag ngem isuna? Iti naudi a labanda ken ni Marquez, kasla napukawen ti pigsa ti disnog ni Pacquiao ta saan nga inggingina ni Marquez, Kasta met nga adu dagiti naipalusot daytoy a danogna a saan a nalisian ni Pacquiao.

Daytoy kadin ti pakauna a pagilasinan a mangrugin nga agsalog ti laing ni Pacquiao agsipud ta kibkiban metten ti narangya a panagbiag, showbiz ken politika?

Kas nadakamatmin iti napalabas, iti bukodmi a biang, panawenen nga isakbit ni Pacquiao ti boxing glovesna. Awanen ti ania pay a paneknekanna a mangkuestion nga isu ti kalaingan a boksingero iti daytoy a panawenna.  Naim-imbag nga agretiro itan bayat ti kaaddana iti tapaw, a saan ketdi nga agretiro kalpasan ti panangdaleb kenkuana iti sabali a tumantanor a nalalaing ngem isu a boksingero.#