EDITORIAL : Ita a Paskua, agyamankami iti Namarsua

Makalawas laengen, selebrarantayo manen ti pannakaiyanak ni Jesucristo, ti Anak ti Dios a naibaon ditoy Daga tapno imulana ti ayat ken kappia, ken tapno isalakanna ti tao manipud iti pannakaikalang babaen ti panangisakripisiona ti biagna tapno masubbotna ti basol ti lubong.

Iti daytoy a pannakaipasngayna, agrag-o ti lubong, nangruna dagiti Kristiano. Nupay nagtalinaed a dakkel a misterio ti pannakaitaona, inarakup dagiti mamati ti kinapudno a ti naiyanak iti kulluong ket maysa a Dios, a nagtagilasag tapno irakurakna ken iwaris ti bin-i ti ayat iti sangalubongan.

Wen, maysa a naindaklan a pagteng ti pannakaiyanak ti Anak ti Dios. Rebbengna ngarud nga agragsak ti amin ta nadanon manen ti panawen a pananglagip nga iti naminsan a Disiembre 25, naitao ti Anak ti Dios manipud iti saklulo ti maysa a birhen.

Karaman ti editorial staff ti Tawid News Magasin kadagiti di mabilang a parsua nga agtamed ken agyaman iti Ari dagiti Ari iti daytoy a pannakaipasngayna. Agyamankami gapu ta iti baet dagiti krisis a nangsanut iti pagilian ken iti sangapagilian, adda pay la a sitatakder ti Tawid News Magasin, adda pay laeng a mangidandanon kadagiti damdamag ditoy Kailokuan ken manglinglingay kadagiti agbasbasa babaen kadagiti sarita ken salaysay nga ipadpadigona iti linawas.

Akuenmi a bassit pay laeng a pagiwarnak ti Tawid News Magasin no maidilig kadagiti dadakkel nga aginaldaw a pagiwarnak ken babasaen iti pagilian, ngem iti baet dayta, sipapannakkelkami a mangirakurak nga an-annongen met ti pagiwarnaktayo ti napateg nga akemna a pannakaidanon dagiti kaudian nga impormasion ken damag kadagiti kailian iti nadumaduma a paset ti lubong..

Wen, babaen ti internet, in-inuten a maserrek ti pagiwarnaktayo dagiti nadumaduma a lugar iti sangalubongan agsipud ta addan naipasdek a websitena: ti www.tawidnewsmag.com ken www.facebook.com/tawidnewsmagasin.

Annugotenmi: amin dagitoy ket babaen ti pamendision ti Dios. Ta uray no kaskasano, agtultuloy ti pagiwarnak nga umaskaw ken madadaan nga agserbi.

Kasta met a kadagiti gagayyem ti Tawid News Magasin nga agtultuloy a mangit-ited iti suportada, Dios ti agngina kadakayo amin!

Iti daytoy a pannakayanak ni Jesus, iyawatmi ti nabara a kablaaw: Naragsak a Paskuayo amin!