EDITORIAL: Ita a Baro a Tawen, suktantayo ugali a babantot iti panagdur-as

Pasangbayentayo ti baro a tawen a nakaragragsak tapno maaddaantayo iti nakananama a sanggiran iti laksid ti nagsasaruno a didigra a nagpasaran ti pagilian. Saan a dagitoy  nadagem a kalamidad a parnuay ti tao ken nakaparsuaan ti lappedtayo a sumrek iti positibo a banag a mangitag-ay iti kinaragsak ken kinanam-ay; kasapulantayo laeng ti mangabaruanan, kas iti panangabaruanan ti tawen tapno ad-adda pay a bumileg ti pakinakemtayo iti ulpit nga insaplit dagiti naglabas a didigra a nangbasnot ti pagilian. Wen, baro a tawen, baro a namnama!

Iti idadateng ti baro a tawen, mapabaro koma met dagiti daan a bagi. Mapabaro koma dagiti aramid a saan a nasayaat.Mapabaro koma dagiti ugali a babantot ti panagdur-as.Mapabaro koma dagiti pampanunot a mangibunga iti nakuyem a panirigan.Iti ababa a pannao, iti isasangbay ti baro a tawen, maaddaantayo iti kabarbaro a panirigan iti biag nga addaan iti naraniag a sirmata ken nabunga a kaipapanan. Saan laeng a  para iti bukodtayo a bagi no di pay para iti pada a tao. Baro a tawen, kabarbaro a panagbiag.

Kadagiti il-ili ken rehion iti Kabikolan, Kabisayaan ken iti Zamboanga Peninsula a dinalapus ti didigra a pinarnuay ti tao ken ti nakaparsuaan, mapabaro koma ti pampanunotda tapno maaddaanda iti namnama ken pinget a makibalubal iti pannubok ti biag. Mangabaruananda tapno maidissoda dagiti daan nga aramid a managimbubukod ken panangabuso iti nakaparsuaan a rason no apay nga adu ti nagsagaba kadagiti naglabas a didigra.

Kalpasan ti didigra, adda pay laeng nasayaat a biag nga agur-uray, ti baro a biag;  kalpasan a nanglangeb ti tangatang, adda iti likudan ti nangisit nga ulep ti init a napnuan rangrang ta babaen ti tulong dagiti addaan iti nabaknang a panagpuspuso nalappedan ti sakit ken bisin, a naparnuay kalpasan ti didigra.

Kadagiti dinalapus ti didigra, sumangbay koma kadakuada ti namnama ken regta tapno taluntonenda ti kabarbaro a dana iti panangbalbaliw. Wen, iti panagbaliw ti baro a tawen, mangabaruantayo met babaen ti panangidissotayo ti daan nga aramid, ugali, ken panagpampanunot.  Itaguyodtayo ti kapakanan ti amin.

Nupay ababa laeng ti biag, napintas ti agbiag nga addaan iti narangrang a sirmata ken napinget a pakinakem a manggaw-at ti kapkapnekan a kaimudingan.

Happy New Year kadakayo amin! (JMA, Jr.)