EDITORIAL: Ita a Paskua, mangiparaburka

Agam-ampayagen iti tangatang ti espiritu ti Paskua. Agsasallupangen dagiti kanta ti Paskua a maipangpangeg kadagiti nadumaduma nga estasion ti radio, kasta met iti telebision. Uray kadagiti warnakan, daytoy kangrunaan a pasken, ti panangselebrar iti pannakaiyanak ti Ari ti Ayat, ti kangrunaanen a linaon kadagiti panidda.

Kadagiti ubbing, daytoy ti tiempo nga ipapanda panagbalaybalay tapno makipaskuada. Ngem maiduman ti panawen ita. Idi ubbingkami, uray la manguratkami a mangipasayag kadagiti kanta ti Paskua, nupay ngalngalenmi no dadduma dagiti dimi kabisado a linia. Nakalawlawan ti isemmi no adda patupat, tinubong, ken dadduma pay a kankanen nga ipapaskuada kadakami. No aggawidkamin, kakaasikami a mangbagkat kadagiti napaskuami, aglalo no adda mangted iti kakaruyen a niog, wenno bungbunga. Ita, kuartan ti kangrunaan a gamgamen dagiti ubbing iti pannakipaskuada. Dida pay kayaten ti binting wenno piso laeng. Masapul a lima a pisos ti itedmo tapno kantaandaka iti “thank you, thank you, ang babait ninyo.”

Idi agbasbasakami iti elementaria, no asidegen ti Paskua, parol ti proyektomi iti eskuela. Dakami payen ti mangsakab iti nabursi a kolor. Dagiti parolmi ti idekorar ti maestromi kadagiti nadumaduma a kuarto ket saminto la maiyawid kalpasan ti Christmas program ti eskuela.

Ngem ita, awanen ti agaramid pay iti parol iti eskuela ta puro ginatang metten dagiti maidekorar iti pagadalan.

Adun ti nagbaliwan ti pannakaselebrar ti Paskua. Saanen a krismas tri manipud iti sangsanga ti salamagi wenno kawayan ti sumabat kenka iti kabalbalayan no di dagiti plastik a krismas tri a napalawlawan kadagiti agkilapkilap a silaw. Idi, nakartib laeng a karton ken garami ti belen a maikabil iti salas; ita, belen a nagatang iti mall wenno dadakkel a pagtagilakuan.

Ngem idi ket ita, saan a nagbaliw ti kaipapanan ti Paskua. Ayat ken kappia latta ti kaipapanan ti isasangbay ti Anak ti Dios ditoy Daga. Ket kas kristiano, agintek koma ngarud ti ayat ken kappia iti kaunggantayo tapno daytoy a lubong ket malapunos iti urnos ken talna.

Imparabur ti Dios ti anakna tapno maisalakan ti lubong. Rumbeng laeng ngarud nga ita a Paskua, agparaburtayo met. Ta tunggal parabur nga ipaaytayo iti padatayo a tao, dakdakkel pay ti subadna a parabur manipud iti Namarsua.
Naragsak a Paskuayo amin!