EDITORIAL: Iti maysa a dekada ti Tawid News Magasin: serbisio a namuli iti pinget ken regget

NASUROKEN a maysa a dekada ti serbisio ti Tawid News Magasin. Maibilang metten a naunday a panawen a panagserbi. Serbisio a namuli iti pinget ken regget para iti ili ken iti amin babaen ti panangidanonna iti balansiado a damdamag publiko a namunganay iti gagemna iti kinaadda iti padapada a trato iti tunggal asinoman ken iti aniaman a pakaseknan  nga awan ti al-alaenna wenno linglingdanna nga anniniwan. Kas kanayonan a pannakapnek, natibnokan pay daytoy iti dinto agkupas a nanam ken imas ti bunga ti literatura tapno maited-maidanon ti essem ken pagduyosan ti asinoman ken panangited itoy iti pannarabay kadagiti agngayangay tapno mapalag-anan ti asinoman a manggaud iti bukodna a bilog.

Iti baet ti agsasamusam a pannubok a sinangona iti inna iyaabante a panagaddang nga agturong iti ingpenna a gagem, saanna nga inggigir dagiti rimsua a lapped ken batungol ta imbilangna ketdi a dugsak laeng dagitoy iti mulinaw a panggepna. Ammona a masagangna amin dagitoy iti taltaluntonenna a dana kas nakaparsuaan iti maysa a panagballigi.

Ta adda, aya, nagballigi a saan nga immuna a napaay wenno naitublak? Ta adda, aya, nagballigi a saan nasubok? Ammona a ti panagballigi ket kasinginna dagiti agsasamusam a lapped ken batungol; nga ammona nga asinoman nga agangal itoy ken agriri dinto met makadanon iti papananna.

Ta kas kuna ni nalatak la unay a basketbolista Michael Jordan: “If you’re trying to achieve, there will be roadblocks. I’ve had them; everybody has had them. But obstacles don’t have to stop you. If you run into a wall, don’t turn around and give up. Figure out how to climb it, go through it, or work around it.”

Ti kapadasan ni Jordan ken dadduma pay a nagballigi ket kapada met laeng ti kapadasan ti Tawid News Magasin. Iti sangapulo ket maysan a tawen, dagiti simmangbay a lapped ken batungol ti nangmuli ken agtultuloy a mangmuli ti ingpenna a pagturongan. Agtultuloy latta a pumayagpag.

No kadagiti dadduma a pagiwarnak iti probinsia nga Ilocos Sur ken dadduma pay a luglugar ket dida pay inabut ti makatawen, nagbalinen nga allitaw lumned-tumpaw iti panagparangna wenno namnaminsanen a naungaw, ti Tawid News Magasin ket ad-adda ketdi a rimmangpaya iti panagtulid ti panawen. Ti inaldaw-aldaw a panagtulid ti panawen ket kasallabay dagiti addangna nga agturong iti panggepna ken kaipapanan ti eksistensiana wenno kinaaddana ditoy lubong.

Babaen ti pannakitinnulong ti soft copy daytoy (website) agtultuloy latta a sumansantak ti pannakaidanon ti impormasion iti asinoman ken sadinoman a paset ti lubong; ti kalikagum a mangammo iti mapaspasamak iti Amianan nangruna iti Probinsia ti Ilocos Sur.  Tapno ad-adda pay a maidanon ti panggepna nga agserbi iti amin amin, saan ngarud a nagpaudi a timmapog iti kabaybayan ti teknolohia – ta ti kabaruanan itan a teknolohia ket maysa met a saka ti komunikasion no di man isu itan ti kaay-ayo nga ugmokan ken pagtampisawan-pagay-ayaman ti agdama a henerasion. Isu nga inyunnatna met dita dagiti takiagna tapno madanon ti amin – ti padapada a serbisiona.

Iti nagan ti panagserbi, maaramid amin dagiti wayat ken wagas a panangidanon kadagiti damdamag ken literatura tapno awan ti maikapis ken malibtawan wenno maibilang a nalisian gapu iti kinaawan ti gundawayda wenno kinaawan ti aksesda itoy ken bit-ang a sumrekanda a mangdanon kadagiti ngumayngayebngeb a mapaspasamak iti Amianan. Ta ti maysa a kangrunaan a motibona ket ti pannakaidanon iti amin ti awitna a tarigagay ken serbisio.

Daytoy ti serbisio ti Tawid News Magasin. Ti serbisio nga agpaay iti amin.

Ket itoy a maika-11 a tawen nga anibersariona, kabuyog-kakuyogmi ni umis-isem nga Apo Init nga agsaludo ken agyaman kadagiti mangsupsuporta iti daytoy pagiwarnaktayo a  Tawid News Magasin ken karaipna ti pammatalgedmi nga agtultuloy  ti panagaddangna  a mangidanon iti serbisiona kadagiti naruay a kakailian, nangruna dagiti adda iti ballasiw taaw a makurkurangan kadagiti padamag ken pagbasaan iti Iluko.  Dios ti agngina!#