EDITORIAL: Iti politika, uray agkakabsat, saan nga agkasurotan

Itay nabiit, naawis ti imatangmi iti maysa a damag nga idiay Batanes, nagsapata a baro a kameng ti United Nationalist Alliance a partido ni Vice President Jejomar Binay ni Batanes Governor Vicente Gato ken ni Engineer Nicanor Abad.

Baluarte ni Department of Budget Management Florencio Abad ti Batanes. Kas pagaammotayo, maysa ni Abad dagiti dadaulo ti Partido Liberal ni Presidente Benigno “Noynoy” Aquino III.

Iti sabali a bangir, ni Binay ti kumpirmado nga itandudo ti UNA a para presidente iti eleksion inton Mayo 2016. Ni met dati a DILG Secretary Rojas ti kandidato ti LP a para presidente.

Ngarud, iti Batanes, saanen a solido ti Liberal Party iti panagballasiw da Gato ken Abad iti UNA. Nagkandidato iti babaen ti LP ni Gato idi 2013.

Dakkel daytoy a makatulong iti kandidatura ni Binay nupay bassit laeng a probinsia ti Batanes. Nangruna, lumtuad nga adda dakkel a rikki iti nagbaetan dagiti agkakapartido idi 2013 a di nabaelan ti agdama nga administrtasion a rinisut.

Ngem iti daytoy a napasamak, naminsan pay a napaneknekan a ditoy pagilian, awan ti permanente nga agkakadua wenno aggagayyem iti tay-ak ti politika. Ditoy pagilian, ti kaduam ita, mabalin a napinget a kabusormo iti politika inton bigat. Yan ti imasna (wenno paitna), uray dagiti agkakadara, mabalin a mapasamak ti panagsisinada gapu laeng iti politika. Uray agkakabsat, mapekka ti langenlangenda, ti panagkaapelyidoda, gapu iti bukod nga interes iti politika.

Inauna a kabsat ni DBM Sec. Abad ni Engineer Nicanor Abad. Iti daytoy ikakappon ni manongna iti partido UNA, maal-alimadmad nga isu ti mangbangga iti asawa ni DBM Sec. Florencio Abadken a ni Henedina, agdama a mangibagi iti distrito ti Batanes. Dakkel la ketdi a sakit ti ulo ti sangsanguen Sec. Abad iti daytoy a mapaspasamak iti baluartena ket kasapulan nga agtignay itan tapno malapdan ti kumarkaro a giwang iti nagbaetanda nga agkabsat.

Pakpakauna laeng daytoy kailian.! Iti pagilian, lumtuadto dagiti kaarngi daytoy a pasamak. Agsasangonto iti politika ti agkabsat, agkasinsin, aguliteg, agikit, kaanakan, ken agkakabagian no saanda nga agkakadutdotan. Mabati a nakatakder ti natibtibker. Masualit iti igid ti dalan ti nakapkapsut.

Ngem kaslanto latta uong ti kaburnok dagiti sagrado a kandidato a mabasbasan wenno bendisionan ti teddek wenno panuli ti kaputotandan nga agari iti teritorioda. Pagsisinnublatanda dagiti puesto, kasla tawid a mabalinda lattan nga iyakar iti sumarsaruno a kaputotanda.

Political dynasty, kaanonto a maduprak, kunam?
Purawton ti wak, kaka!