EDITORIAL: Iti Tawen 2016, ania ti agur-uray kadatayo?

Bayat a masursurat daytoy, maysa manen a tawen ti malapsi iti binulong ti panawen. Manipud ditoy opisinami, mangrugin nga agdadaraddan dagiti bumtak a rebentador ken napipigsa a paputok. Makapamitlon a nagsubli diay traysikel nga adda guyguyodenna a dakkel a lata.

Ngem masaludsod: ania ti idateng ti sabali manen a tawen iti biagtayo? Sumangbay kadi metten ti imbag ken progreso iti biagtayo nga umili, saan a kas iti kallabes a tawen nga ad-adda ti panangpairuttayo iti sinturontayo agsipud ta malaksid nga immingpis ti matgedantayo gapu iti isusuyop dagiti magatgatang, nabattaway pay ti pannakaited iti nangatngato a sueldo?

Iti kallabes a tawtawen, naipalkat iti rupatayo dagiti agas-asimbuyok nga anomalia a nakaisawsawsn dagiti mararaem nga agtuturay. Adda dagiti naisaklang ngem anian ta nagginad ti panaguyas ti kasoda tapno makitatayo met koma a babassit nga iti daytoy a pagilian, awan ti sansantuen ti linteg, uray no nabaknangka, no nakabasolka iti linteg ti tao ken iti Dios, ikarom ti nagbasolam. Ngem aggibuston ti panagtakem ni Presidente Noynoy Aquino, adayo pay nga agtunged ti kaso dagiti nabibileg ken natuturay.

Madakamattayo ti Maguindanao massacre no sadino a napapatay dagiti nasurok limapulo a tattao a pakairamanan ti nasurok 30 nga agiwarwarnak ken kameng ti media. Adda kadin nagdur-asan dagiti kaso? Agmalmalatimat pay laeng, Kaka! Ti makadakes, inton malpas ti termino ni Aquino, dakkel ti posibilidadna a maisagad ti kaso iti sirok ti napuskol nga ikamen agingga iti malipatan dagiti umili ti kinadamsak nga impaay dagiti akusado kadagiti biktima.

Ngem uray sangkapit-ing laeng, napigsa pay ti namnamatayo nga iti idadateng ti baro a tawen, dumteng met ti naranraniag a masakbayan para kadagiti marigrigat a kas kadatayo. Baro a tawen, baro a namnama, saan kadi a kasta?

Ita a 2016, intayo manen pilien dagiti baro a mangidaulo iti pagiliantayo iti innem a tawen. Adda kadi dakkel a namnama a maaddaantayo iti natibtiber ken mannakabael a lider a mangakay iti pagiliantayo iti narabraber ken naberberde a kapanagan? Nupay ibagbaga ti sentidomi a sangkapuling ti namnama a maikkantayo ita a 2016 iti makabael a mangidaulo kadatayo, saanmi a punasen iti pusomi a ti sumaruno a mabutosan a lidertayo ket kas katibkerto ti napuskol ti pader ti determinasion ken tarigagayna a mangalut-ot ti pagiliantayo iti kinakurapay ken rigat a nabayagen a mangidumdumudom kadagiti babassitan ken makurkurangan.

Wen, baro a tawen, baro a namnama uray kas kaingpis ti papel ti pagkapkaptantayo.#